Asia Bibi hè una dunnuccia, mamma di famiglia d’un cinquantina d’anni, chì cristallizeghja oghje è malgratu ella, e fratture religiose, suciale è sucietale di u Pakistan.
Operaia agrìcule, di religione cristiana, si cunfronta un ghjornu cù d’altre donne musulmane di u so paese. Andendu à un pozzu riservatu à i musulmani per bèiesi un bichjere d’acqua, pruvucheghja senza vulella a còlera di sse donne chì s’arricummàndanu à u prufetu Mahomet. Asia Bibi li risponde tandu «Mahomet hè u vostru prufetu, u meiu si chjama Ghjesù ». È cù sse poche parulle di verità, a so vita hè ciambuttata. Paese à maghjurità musulmana, di tendenza radicale, u Pakistan hè scuzzulatu di manera regulare da zergue estremiste. A ghjastema hè cosa delicata… è, spessu, omu si ne ghjove per regulà i so conti. Ghjelusìa o gattivezza, parechji mercìssenu in priggiò per vìa di sse derive chì ponu esse ancu murtale. Asia hè arrestata, ghjudicata, cundannata à a morte in u 2010. S’addispera in u curridoghju di a morte durante 8 anni. I soi è u s’avucatu ghjùnghjenu, cù l’aiutu di demucrati in u mondu sanu, à difèndela di pettu à a Corte Suprana di u so paese. Ancu assai, e prove di a so nucenza sò purtate è Asia hè assolta u 31 d’ottobre scorsu. Puru, liberata, ùn hè lìbera ! Di pettu à a zerga musulmana di più in più scimatulita, manifestazioni maiò fàcenu pressione nant’à u guvernu. Asia hè cunfinata in casa soia è ùn pò più sorte. U guvernu li impedisce ancu di sorte di u paese, allora ch’ella hà dumandatu l’asiliu pulìticu à l’infora, à i Stati Uniti, a Grande Brittagna o à u Canadà. E manifestazioni sò state cusì viulente è accanite, chì u so avucatu hè statu ubligatu di fughje u Pakistan. Asia, ella, hè chjosa in un locu sicurizatu. «Ci vole ch’ella parti in furia, ella è a so famiglia » dice u presidente di u so Cumitatu di sustegnu. « Senza prutezzione, ùn pò stà in vita cinque minute in carrughju ». È sò in perìculu dinù, tutti quelli chì l’aiùtanu. U Tehreeke- Labaik Pakistan, partitu radicale pachistanese, dumanda à ch’ella sìa appendicata Asia Bibi. « Puderemu sacrificà e nostre vite ma ùn faremu mai cumprumessu nant’à l’onore di u prufetu » dìcenu ssi fanatichi chì galvanizèghjanu decine di millaie di ghjente in carrughju. L’islamisti anu postu un ricorsu contr’à a so liberazione è rivendichèghjanu un antra cundanna à a morte, minacciendu di bluccà u paese.
Asia Bibi lotta per stà in vita, ma a so resistenza franca a so sorte. Hè diventata ssa dunnuccia, un sìmbulu di a lotta contr’à l’oscurantìsimu.
Fabiana Giovannini.
