Una settimana una parolla (O duie, o micca, sfidàtevi di e « parolle parolle parolle…»)
A y’aɣyul a bu ccama, yeğğan leḥbab ɣer tama.
U sumere cù a cicatrice indelèbile, hà scartatu tutti i so amichi. (Pruverbiu cabilu)
Salute a tutte e a tutti. St’etima, parleremu di… u sumere. « Anh ! Ùn la sai tù chì i runchi di sumeri ùn ne colla in paradisu ? » A ti pigli cusi ? Va be, femu un chjam’e rispondi. Dunque a me tocca : si un sumere calzu e vestutu. «Di coda di sumere ùn si pò fà stacciu di seta. » Ghjova piu un sumere vivu che un duttore mortu. «Martin trova l’àsinu (ùn trova nunda). » A pazienza he a virtu di i sumeri. « I sumeri troppu à l’oziu èrpianu. » Ma t’anu a scusa : portanu u vinu e beienu l’acqua.
Va be, ava pudemu principia u studiu. Sapete chi so parechje manere di chjama issu «mammiferu dumesticu piu chjucu ch’e u cavallu, cu l’orechje piu longhe e a coda a pelu longu a l’estremita » : u sumere (o samere, sameri, sameru), l’asinu, u ciucciu (Corti), u cicciu (Purtivechju), u prisoghju, l’assu (Bunifaziu), u micciu. U feminile he a sumera, l’asina, a miccia o a fera. Escenu guasgi tutte da u talianu, induv’e a parolla aduprata di piu he asino. Ma si trova dinu somaro, ciuccio, ciciu, miccio. Un esiste micca una parolla indo europeana per insegna u sumere. Ghje a parolla sumerica « anšu » chi he stata scelta in tutte e lingue rumaniche (fora da u rumenu). Da « anšu » si ottene u latinu asinus, e da qui u corsu asinu, assu (< *asnu < asinum). In quantu a sumere, vene da u grecu σάγμα (sagma) «mantellu » e dopu « umbastu ». Passa in latinu (cu u derivatu sagmarius > saumarius in latinu tardivu > somaro) po in l’Auropa sana. Ciuccio/u he una parolla onomatopeica di Calabria o di Campania ; ciccio/u he una parolla zitellesca di Lombardia ; miccio/u sorte da u latinu musimo imprestatu a u grecu μούσμων (mousmon) «muvra, stalla ». L’etimologia di fera he prublematica : po dassi chi ricolla a u latinu fera « animale feroce » e chi sarebbe dunque una manera ironica di parla d’un animale di somma.
Esiste una razza di sumeri corsi chi l’associu A Runcata cerca a cunta e a precisa i so carrateri sputichi. In l’anni 1930, eranu 20.000 sumeri. Ma cu a demucratisazione di a vittura automobile, un ne ferma piu che 1.000 a 2.000. Oghje ghjove sopratuttu pe e spassigjhate, u trasportu di i sacchi di i giranduloni, o d’animale mansu, chi a u sumere li piace a cumpagnia.
Eccu l’ora di a canzona :
Marina Chovin.