Natu in u 1995, di spìritu cristianu, A Fratellanza hè un associu ricunnisciutu d’utilità pùblica. Opereghja à u serviziu di i più pòveri. Cusì, hà una struttura d’accolta, notte è ghjornu, chì rende parechji servizii pè i più bisugnosi.
Hè statu fundatu in grazia à un donu di Michele Lorenzi, sparitu in u 2015.
U situ di l’associu dice chì sò 787 personi accolte à l’annu, 3884 notte è ripasti distribuiti nant’à 12 mesi, 150 cartulare amministrativi seguitati.
« A nostra azzione, dice u so presidente Jean Claude Vignoli, si scrive in un spìritu di sulidarità pròpia à a cità di Bastia. Avemu lucali suciali accessìbuli à i senza tetti è à e personi ch’anu difficultà per truvà un alloghju ».
Ci hè cusì un centru in Bastia, battizatu Anna, è lucalizatu carrughju Luce di Casabianca. Hè statu rimessu à novu in 2017, in grazia à l’aiutu di a Cullettività di Corsica, u dipartimentu tandu è a merìa di Bastia per 144.000 €. L’associu tene dinù un risturante suciale è hà accessu à uni pochi d’alloghji suciali da pudè risponde à e dumande urgente.
L’accolta di ghjornu, apertu da 8 ore di mane à 7 ore è mezu a sera, permette à quelli ch’anu bisognu di pigliassi un cafè cù un buccunettu, in partenariatu cù l’associu Partage è di u risturante suciale ; di pudè lavassi, di sbarbassi, di dispone d’un spugliatoghju cù vestiti puliti da pudè lavà i soi è tene dinù a so roba in un locu sicuru. Ci hè un aiutu alimentariu, un accessu à una biblioteca è un cantu per leghje, guardà a televisione, o ghjucà à i scalchi o altri ghjochi.
L’accolta di notte si face da 7 ore di sera à 7 ore di mane. A Fratellanza dispone di 13 letti à l’anzianu uspidale di Bastia, cù una surveglianza tutta a notte.
A Fratellanza prupone dinù un assistanza medicale in partenariatu cù l’associu Corse Malte per ottene medicamenti per un dettu, spechjetti o altru, è cù l’uspidale di Bastia per un sustegnu psicològicu o pè i bisogni sanitarii di e personi. Porghje aiutu dinù pè e dimarchje amministrative è u cuntattu cù l’urganìsimi pùblichi, Pôle emploi, l’Assicuranza malatìa, l’Allucazione familiale, u RSA, a prefettura dinù pè i migranti, eccèttera. L’associu aiuta e personi per ottene un alloghju, per avè un sustegnu sculare, amparà u francese, è tutte e dimarchje necessarie à a sucialisazione di a ghjentarella.
L’associu urganizeghja dinù mumenti di cunvivialità cum’è u ripastu di Natale per un dettu, cù un pìcculu rigalu à ugnunu.
Ammentemu chì a Corsica hè a regione a più pòvera di Francia, malgratu tutte e misure di lotta messe in ballu dapoi anni. •
Per l’infurmazioni : https://a-fratellanza.corsica
Per un donu : https://a-fratellanza.corsica/faire-un-don
