A Maffia Nò A Vita Iè hè natu di sittembre 2019 d’una rivolta citatina contr’à a viulenza maffiosa, è u denegu di e stituzioni corse è francese di pettu à stu perìculu. Era è ferma una dimarchja curagiosa, chì « cuntinuà à tàcesi ùn hè micca rispunsèvule » avìanu dettu tandu une poche di persunalità in giru à Léo Battesti, Marie France Giovannangeli, Josette Dall’Ava Santucci, Vincent Carlotti, Lucie Simeoni*.
« Invitemu a pupulazione à una presa di cuscenza di e minaccie chì cumprumèttanu di manera grava l’interessi cullettivi di a nostra sucietà è pè u più di quelli di a nostra giuventù » dicìa a so cunferenza di stampa u 25 di sittembre, lampendu una chjama à u pòpulu per mette da cantu « i mettodi barbari chì strùghjenu di manera spietèvule e putenzialità di u nostru territoriu ». Invitava a ghjente à testimugnà, uffrendu un spàziu di dibàttitu per scumbatte sta malamorte.
Una seconda chjama era lanciata à l’eletti corsi, da ch’elli « s’impègnanu, si sprìmanu è si prisèrvanu di tutti i lobbì maffiosi ». U cullettivu cusì creatu dumandava una sessione speciale à l’assemblea di Corsica cunsacrata à ste derive.
Infine una terza chjama era lampata à u Statu ch’hà in manu i puteri rigaliani, da ch’ellu riconnosci u perìculu maffiosu è metti in ballu l’arnesi da scumbàttelu. Li dumandava dinù di scrive in u drittu penale u delittu d’assuciazione maffiosa.
Pocu tempu dopu, u 6 d’ottobre, un antru associu contr’à a maffia era creatu, dopu à l’assassiniu di Massimu Susini u 12 di sittembre 2019, un giòvanu corsu di 36 anni. U cullettivu chì porta u so nome dinunzia dapoi ste derive frà u quale u tràfficu di droga in Carghjese ch’ellu scumbattìa Massimu. Anu sempre agitu di cuncertu i dui cullettivi.
A so azzione hà permessu di fà move e cose. L’Assemblea di Corsica hà tenutu di nuvembre 2022 a famosa sessione chì li era stata dumandata. Parechji attelli sò stati messi in ballu per riflette nant’à stu fenòmenu chì si runzeca a nostra sucietà. Da quì à a fin’di stu mese di ferraghju, un antra sessione ferà u puntu di u travagliu di l’attelli è di e pruposte messe in ballu cù a sucietà civile.
Parte di u Statu dinù e cose anu avvanzatu. U ministru di a Ghjustizia, Eric Dupond Moretti, hà annunziatu parechje misure à vene, riflettendu nant’à l’arnesi creati in Italia per luttà contr’à a maffia siciliana. L’8 di ferraghju scorsu, u precuratore di a Repùblica Nicolas Bessone hà dichjaratu – infine ! – « A quistione ùn si posa più, esiste una màffia corsa contr’à a quale duvemu luttà ». Fecìa quasi 30 anni chì s’aspettava a ricunniscenza da u Statu di sta deriva maffiosa in Corsica !
L’associ sò e nostre forze. •
* Jean-Claude Acquaviva, Jean-Charles Adami, Jean-Nicolas Antoniotti, Jean-François Bernardini, Vannina Bernard-Leoni, Marc Biancarelli, Dominique Bianconi, Lavinie Boffy, Jérôme Ferrari, Guillaume Guidoni, Pierre Gambini, Dominique Mattei, Jacques Mahdi Mattei, Cécile Mufraggi, Antoine Orsini, Jean-Paul Poletti, Josette Risterucci, Paul-Marie Romani, Simoni Sebastien, Jacques Thiers, Dominique Yvon…
Cuntattu è infurmazioni : www.maffiano.com
