Puntettu, Spaziu Gaudin, Mantinum, Aldilonda, Spassimare Sud è Nordu, Bon Pasteur, Cità di e Scienze, rinnovu urbanu in Lupinu, demucrazìa participativa cù prugetti decisi da l’abitanti stessi, cansatoghji… Bastia cambia. À passi sicuri. Cinque anni dopu à a vittoria di Gilles Simeoni à e municipale bastiacce, principia à sorge u Bastia di dumane. Di sicuru, omu vulerebbe andà più in furia, ma s’acconcia l’andatura d’un antra cità, ricca di u so passatu, imbellita da u so patrimoniu, e so animazioni culturale, i so festivali, è aperta nant’à u mare, cù una mubilità riinvintata per dà un alternativa à a vittura, è pruvà d’accorge u Bastia stòricu è quellu d’oghje. 1000 piazze di stazziunamentu sò state create in cinque anni. 800 in l’Arinella, Toga, San Francescu, Sant’Antone, 160 in lupinu, 49 in Cardu, 300 torna sò in cor’di custruzzione à u spaziu Gaudin è 400 altre saranu custruite in u Cansatoghju di A Capoghja, à a surtita sud di Bastia, leendu a gara di Lupinu à u Spassimare. 900 piazze torna si faranu à a gara di Bastia è corre sempre u prugettu di cansatoghju maiò in Toga. U scopu : dà a pussibilità à i Bastiacci di lacà a so vittura à l’orlu di u centru cità, è pudè caminaci à pedi o cù e navette gràtisi. Ridà soffiu è calmu à u cor’di a cità per rivuluziunà i nostri modi di trasportu.
Ammentàtevi, era un ingaggiamentu presu in u 2014, rende Bastia à i Bastiacci, cume l’hà fatta in deci anni a cità galiziana di Pontevedra. Mette dinù in lea u trenu, sparghje l’altri mezi di mubilità dolce, cume a bicicletta, eccu a chjave d’un Bastia chì si move !
Ssa visione nova hè cusì bè palisata cù u caminu à longu à u mare, da Toga à l’Arinella cù Spassimare è l’Aldilonda. Bellìssima spassighjata chì rende à Bastia u so balcone marìttimu. À tempu, Bastia valurizeghja u so centru stòricu cù u rinnovu di u Puntettu, puntellu di a stòria di a nostra cità. U si vulìanu strughje, rimpiazzà a prima piazzetta di a cità è casali di u XVIu sèculu da un una custruzzione oghjinca è u so parking. I naziunalisti anu dettu di nò è un prugramma di riabilitazione hè statu messu in ballu, tinèndusi u paisagiu seculare di u quartieru. Eppò unepoche di prugetti o altre riabilitazioni sò messi in ballu, per un dettu u rinnovu urbanu in Lupinu cù accunciamenti pùblichi, arburami, cumerci… Ma a più bella rivìncita nant’à u passatu clientelistu di Bastia, ferma a demucrazìa participativa induve u Bastiacciu riflette è mette in ballu prugetti soi. Una càrtula di a demucrazìa participativa hè stata aduprata, un bugettu di 150.000 àuri attribuitu è a prima campagna hè stata una rièscita !
Una quindecina di prugetti sò stati messi à u votu, è cinque ritenuti, unu per arricoglie i mòcculi di sigarette, un antru mette in ballu un appiecazione smartphone per pagà u so stazziunamentu, u terzu è u quartu prupònenu d’accuncià lochi di virdura. U quintu premiu và à un cumpattore sulare per riduce u mulizzu.
Ambiente è benestà, eccu a vulintà citatina ! À passi sicuri, Bastia avvanza.
Fabiana Giovannini.
