Scola assuciativa d’insignamentu immersivu in lingua corsa.
O chì piacè di vede tutti ssi cinnini piglià a strada di e nostre scole, apperlamanu di i so parenti cummossi ! Stu 6 di sittembre in Bastia è in Biguglia, sò 25 ciucci ch’anu fattu a so prima rientrata in e scole di Scola Corsa ! Un mumentu stòricu pensendu chì frà sse chjome bionde o brune ci sò forse i primi bascigliè di Scola Corsa da quì à 15 anni ! Perch’è a scumessa hè questa quì, accumpagnali à longu à a so scularità sin’à fanne omi è donne chì pàrlanu un corsu schietu è chì puderanu anch’elli, ghjunti maiò, difende è sparghje a nostra lingua è a nostra cultura !
Cari amichi lettori, avete lettu u nostru nùmaru speciale d’Aostu 2021 chì vi spieca ciò ch’ellu hè u scopu di ste scole è cum’elle anu da funziunà (u pudete cummandà scrivènduci), eccu quì belle fiure di a nostra prima rientrata.
Felicitemu è auguremu ventu in puppa à l’associi di i parenti è à e maestre, Serena Guaitella, Anghjulamaria è Anna Catalina Santucci ! Dinù à e duie aiute materne, Sandrine Gaspari è Alyssia Taddei.
Vi lampemu torna una chjama à sustene ss’operata maiò pè a nostra lingua. Aiutàteci ! Mandàteci u vostru sustegnu ! Sparghjite sta chjama. Forza è longa vita à e nostre scole ! •
Per sustene Scola Corsa
→ BP 12 – 20416 Ville di Petrabugnu
→ Helloasso : bit.ly/scolacorsa
