I giòvani di u Sporting anu eliminatu di a cuppa Gambardella a squadra di Lyon.
Hè una bella prudezza ! Ècculi qualificati pè i quarti di finale di una cuppa prestigiosa pè i giòvani ghjucatori di pallò.
L’U18 di u Sporting scumbàttenu in campiunatu regiunale. Èranu opposti à l’U19 di Lyon chì ghjòcanu in campiunatu naziunale è sò esciuti di u centru di furmazione frà i più rinumati di e squadre prufessiunale di ghjocu à pallò ! Ghjè dì a prudezza di sti giòvani bastiacci !
Nata in u 1954, a cuppa Gambardella face sunnià tutti i giòvani ghjucatori di futbol in Francia. Hè una cumpetizione aperta à i menu di 19 anni di i club francesi. Per elli, ghjè l’uccasione di fassi cunnosce. Suvente omu ci si scopre i più prumettitori di u futbol francese. È suvente dinù, dopu à avè sbrillatu in a cumpetizione, sò chjamati in a squadra prima di u so club, ponu ancu fassi rimarcà da a selezzione France Espoirs.
I nostri giòvani è u so coach, Filippu Le Maire, avìanu già eliminatu Ghisunaccia, Rodez et Troyes, ma Lyon… era più chè favuritu ! Malgratu l’altu livellu di ghjocu à pallò impostu da l’avversariu, i Bastiacci anu scumbattutu fermu, cù attacchenti intusiasti cù i Dagneaux, Giambernardi, Keita, Medini, Querci… è ci sò ghjunti in grazia à i so dui guardiani. Fofana durante u macciu, hà mantenutu u 0 à 0, è Piscopo durante a sequenza di i tiri finali, hà datu u colpucciu necessariu liberendu Furiani induve u pùblicu di a tribuna sud s’era mubilizatu. U Sporting si qualificheghja 4 à 3 pè u pròssimu giru, à dui macci di a finale…
« Hè una gioia tamanta. I zitelli anu ghjucatu cù u core, è fattu prova di resistenza… Hè un gruppu generosu chì vince sperienza à longu à i macci … Ghjè un avventura d’amicacci chì mette in valore a furmazione » hà dettu u coach.
È ghjè u più impurtante : sta prudezza mostra a qualità di u travagliu fattu pè a furmazione di i giòvani. Sciaccamanemu dunque u club, u staff è i nostri turchini bramendu ch’elli francheranu u pròssimu giru ! Forza Bastia ! •
A squadra turchina : Fofana (pò Piscopo). Ceccarelli. Dottel. Bennabi. Douce. Bourimech. Giambernardi (pò Grassini). Casanova. Dagneaux. Medini. Keita (pò Querci).
