L’Associu Bunifazincu per Capisce è Difende l’ambiente in Corsica hè natu in u 1996, à mumenti 30 anni ! Hè un associu ch’agisce in Bonifaziu da ch’ellu sìa rispettatu l’ambiente. « ABCDE hè plurale è n’hè fieru. Hè cumpostu di donne, omi, ritirati, attivi, da culture, urìgine, sensibilità pulìtica larghe è sfarente. Leatu à nisun partitu, u nostru associu ùn brama ne putere nè ùn accetta ricuperazione » dice u so situ.
Si ne parla pocu à livellu di a Corsica, per vìa di u so spaziu d’intervenzione nant’à u campu bunifazincu, eppò à u livellu di l’ìsula, ABCDE hè sociu di u Cullettivu per l’appiecazione di a lege liturale in Corsica ch’adunisce parechji associ di difesa di l’ambiente è parla à nome di tutti.
Ch’elli sìanu abitanti o nativi di a cità, i so militenti, cù a so presidente Vincente Cucchi, intervene ogni volta ch’ella li pare necessaria pè difende l’ambiente è a biodiversità in a cità è u so circondu. « Ugnunu di noi hè leatu da i valori è u patrimoniu naturale è stòricu di Bonifaziu, dinù u putenziale di benestà da spàrtesi chì franca largamente i muri di a cità. I bunifazinchi sanu resiste anch’elli è a so voce si franca i rampali ! » dice torna l’associu : « Vene u tempu induve capisce è cunvince ùn basta più. Ci tocca à prutege è aiutà. Ci vole à bàttesi. U nostru associu hè agreatu, vale à dì ch’ellu pò purtà lagnanza in ghjustizia. »
ABCDE dinù partecipeghja à l’istituzioni in tantu chì associu di difesa di l’ambiente, « ùn tocca micca à noi di sustituìscesi à a cumuna ben intesa, o à quelli in càrica di difende e lege. Ci sprimemu di manera lìbera nant’à e scelte, ghjuste, pare è sulidarie da fà in u rispettu di l’interessu cumunu » dice torna l’associu, « suvente e chjàchjere ci imprèstanu azzioni imaginarie, putere di vetò, per putachjà nant’à u nostru associu. Puru a nostra porta hè sempre stata aperta à u diàlogu, in a trasparenza, avemu sempre vulsutu mette in davanti a prevenzione nanzu à l’azzione. »
Cusì hè intervenutu di manera vària dapoi ssi trent’anni ABCDE in u duminiu di l’urbanìsimu, è ci hè di chè fà ! Ch’ellu sìa in cor’di a cità, cum’è pè a caserna Montlaur o per difende munumenti patrimuniali, o torna contr’à u pianu lucale d’urbanìsimu (PLU). O ch’ellu sìa fora di i rampali, per scumbatte contr’à u scàndalu di a privatisazione di l’ìsula di Cavallu, contr’à u golfu di Sperone, per dinunzià dinù mondu custruzzioni illegale nant’à u liturale bunifazincu, per difende u chjassu di u liturale o per difende u mare è e so sponde in e Bocche di Bonifaziu.
S’hè impegnatu assai in i dibàttiti di u Padduc messu in ballu tandu da u putere di dritta. Era membru di u Fronte unitu contr’à quessu Padduc chì cuntava in 2009 tutti l’associ ambientali cù partiti pulìtichi naziunalisti è di manca cum’è u Partitu cumunista. Dinunziàvanu l’òpera di distruzzione di u liturale di a Corsica… Ancu assai hè statu annullatu è un veru pianu di sviluppu durèvule hè statu messu in ballu, dibattitu è adupratu in u 2015.
Da Bonifaziu à Portivechju, Rundinara, Balistra, Cannettu, Sperone, Cavallu… è mondu siti rimarchèvuli, spàzii agrìculi è patrimoniu naturale magnìfichi, dèvenu assai à ABCDE. Da ringrazialu. •
