E più grande fureste di u mondu si tròvanu in Amazonìa. Sò cusì più di 5 millioni di metri quadrati, vale à dì quasi 400 milliardi d’àrburi, cù decine di millaie di varietà. A furesta amazuniana cuntene à tempu a più grande biodiversità vegetale è animale di a pianetta. Un veru pulmone chì ci aiuta à dà di pettu à u riscaldimentu climàticu. I s’arburoni s’ingòllanu mondu quantità di carbonu è prudùcenu ossigena. Hè un bisognu tremendu. Eppuru !… l’omu si strughje pocu à pocu ssa richezza per allargà sempre più i spazii d’allevu, da chì i paesi detti « sviluppati » cunsùminu carne quasi tutti i ghjorni.
S’abbàttenu l’àrburi per fà cresce di chè nutrisce u bestiame. Una scimità pè a natura ma dinù pè a salute di l’omi.
I pòpuli indigeni d’Amazonìa si sò aduniti per lancià una chjama cumuna à l’ONU.
U Brasilu (nanzu à l’affaccata di Bolsonaro à u putere), l’Equateur, u Perù è tutti i paesi vicini, anu mandatu una lèttera à l’Urganisazione di e Nazioni Unite per fà pianta a destruzzione di u più grande ecusistema di a pianetta. «Vi scrivimu perch’è un quartu di l’Amazonìa, tesoru di biodiversità, hè statu già struttu. Sè a sfurestazione ùn pianta micca, saremu da quì à qualchi annu à un puntu induve ùn si puderà più parà nunda. Ss’ecusistema ùn puderà più assume e so funzioni vitale pè a pianetta ». Fendu smarisce a furesta, e nostre civilisazioni industriali, fàcenu smarisce civilisazioni ancu più anziane chì càmpanu in armunìa cù a natura, rispettosi di l’ambiente. U mondu dettu « civilizatu » sachighjeghja ssi lochi preziosi, spàrghjenu e so indùstrie, di l’allevu, di u legnu, di e mine o di matrali. S’oppònenu i corci autoctoni per pruvà di difende cù pochi mezi, i sò lochi di vita. È sò perseguitati o criminalizati, imprigiunati o assassinati. Chjàmanu à l’ONU è i guverni mundiali à « agisce di manera glubale per fà piantà l’attache contr’à l’ambiente ». Ma frà elli oghje, u novu presidente di u Brasiliu hà decisu di suspende sse dumande eculògiche per dà di più putere à l’industriali. U saccheghju cuntinueghja.
Corcia pianetta !
Fabiana Giovannini.
