Ancu di grazia, u tempurale chì hà toccu a regione bastiaccia ùn hà fattu nisuna vìttima. Ma sì e fiure di i ghjargali chì falàvanu à rivoccu anu impres- siunatu, ùn ci vole à scurdassi chì un ghjornu o l’altru, a natura ripiglia a suprana nant’à l’omu. À mezu à a piaghja tutta urbanizata, còrrenu sempre i fiumi.
Avete tutti vistu i filmetti amatori di u tempurale, da veru impressiunanti. È si pò felicità i succorsi ch’ellu ùn sia accadutu nunda di veramente grave. Oghje si còntanu solu disguasti materiali. Ma ci vulerà à stunacci, una volta di più ? Avìamu parlatu annu di a memoria di i lochi chì si perde, è di u fattu chì spessu a tupunimia c’insegna i lochi d’acqua induve saria statu megliu d’ùn custruisce micca. Da leghje : Forse, ùn ci vulia micca à custruisce custì Sò (per esempiu) i nomi cumposti à partesi da : canna, padula, ìsula, fanga, pozzu, fiume, lotu eccètera. Ci vuleria à studià in detagliu a tupunimia di a piaghja di u circondu bastiacciu. À mezu à ste zone forse appena troppu custruite à certi lochi c’èranu in i tempi fiumi chì currìanu. Un’ochjata à l’anticu catastru ch’ellu si pò cunsultà in lìnea nant’à u situ di u CD2B ci dice chì à cantu à a zona cummerciale tocca da a fiumara, c’era un fiume chjamatu San Pancraziu : Oghje, hè u fiume chì hè annigatu à mezu à u cimentu (fiura Geoportail) Nunda d’anormale ch’ellu ripigli un ghjornu a suprana…