Amnesty International hè un muvimentu ch’agisce in u mondu sanu pè a difesa di i diritti umani. Nasce in u 1961 dopu à a cundannazione à 7 anni di prigione di duie studienti purtughesi ch’avìanu laudatu a libertà in piena dittattura Salazar. Parlendu di « i prigiuneri scurdati » un avucatu inglese, Peter Benenson, chjama à l’amnistìa. Una campagna di sulidarità si tene in parechji paesi è strappa a prima vittoria di ciò ch’hè diventatu dopu Amnesty International. « Inseme, cambiemu e vite, cambiemu e lege » dice l’associu, « avemu vintu numarose vittorìe, pè a libertà, pè a dignità, pè a ghjustizia. Ogni petizione, ogni lèttera, ogni spartera, ogni donu, ogni azzione, ci avvicina un pocu di più di a pròssima vittoria. »
Amnesty International hà ottenutu a liberazione di millaie di personi imprigiunate à tortu. Hà strappatu l’abulizione di a pena di morte in paesi cum’è u Burkina Faso o u Statu di Washington, a depenalisazione di l’omossessualità in Ìndia, l’adopru d’una lege chì prutege e vìttime di tortura in tempu di guerra in Bosnìa Erzegovina, l’abrugazione d’un artìculu in a Custituzione irlandese ch’impedìa l’abòrtulu, a fine di u visà di surtita pè i migranti di u Qatar, è parechje vittòrie torna pè i prigiuneri, pè e donne, pè i travagliatori, pè a pace…
Conta oghje 10 millioni di membri. Hè un muvimentu indipendente di e tendenze pulìtiche, i guvernamenti, l’interessi ecunòmichi, o e credenze religiose. U so finanziamentu si face solu cù e cutisazioni di i so membri è i doni. St’indipendenza li permette di conduce inchieste, spertìzie è azzioni imparziale. Ogni annu, face u bilanciu in un raportu di a situazione di i diritti umani in u mondu. Hè statu Premiu Nobele di a pace in u 1977. A so voce hè intesa, è i so raporti, i so cumunicati, e so petizioni, permèttenu di sensibilizà e pupulazioni è di fà avvanzà a càusa di a libertà, di a ghjustizia è di a dignità di l’omi dapertuttu in a pianetta.
In Corsica, in Cismonte, un antenna d’Amnesty International hè stata creata in 2009, fendu sèguita à un antra antenna ch’esistìa nanzu. Spàrghjenu l’azzioni è e campagne di u muvimentu internaziunale, tramàndanu i so valori in e scole, urganizèghjanu mostre in e fiere è in i festivali da sensibilizà à l’impurtanza è u rispettu di i diritti di l’omu.
Dapoi 11 anni, l’associu urganizeghja un festivale di sinemà nant’à i diritti umani. È in Corsica dinù si fàcenu pruiezzioni, dibàttiti è mostre.
Ogni annu, Amnesty alerta nant’à u rinculu di i diritti di l’omu in Francia, per vìa di e discriminazioni raziale, l’offese à a libertà di spressione o à u drittu à manifestà. U muvimentu chjama à a presa di cuscenza contr’à e minaccie chì pèsanu nan’à u Statu di Drittu, u non rispettu di e cunvenzioni internaziunale, o una pulìtica strangera ch’ùn mette micca abbastanza i diritti umani à u centru di e so priorità. « Oghje, di pettu à a crèscita in putenza di u discorsu d’odiu è contr’à i diritti, alertemu contr’à u rìsicu di rinculu di più in più impurtante di e nostre libertà è di i nostri diritti in Francia », dice l’ONG assai inchieta di a situazione in Francia è in u mondu. •
