Arritti, cari amichi lettori, vi augura Pace è Salute per voi è tutti i vostri cari. Chì 2025 sia più bella per tutti è ci porghji a forza è a vuluntà di creà lee frà noi chì ci permetteranu l’avvanzate ch’abbisogna a Corsica.
St’annata hè quella di i nostri 59 anni. Vale à dì chì in 2026, Arritti festighjerà i so 60 anni. Sessant’anni di lotta è di rialisazioni ad accumpagnà u pòpulu corsu è e so evuluzioni. Trè generazioni di giòvani Corsi è oghje un antra generazione pronta à rilevà scumessa per custruisce l’avvene di ssu paese. Li tocca à impegnassi è truvà a forza di scumbatte contr’à l’avversità, i malanni, e gattive tentazioni, l’addisperu, ma diniù l’orgogliu è a ghjelusìa ch’affòcanu e vuluntà. Li tocca à truvà fiatu è sumerinu per adunìscesi è aiutassi di pettu à tutte sse difficultà.
Arritti cuntinuerà à accumpagnala. Basta à dalli forza ancu à ellu. Basta à avè cuscenza di u so pesu è di u rolu ch’ellu pò tene.
O ghjente, Arritti hè un testimognu, Arritti hè un arnese. Ghjuvìtevine. U nostru settimanale rende contu, ma dinù analizeghja, alerta nant’à i perìculi, urganizeghja dibàttiti, prumove edee, prupone suluzioni. E so pàgine sò aperte, e so cundanne ùn piàcenu à tutti, à le volte ponu ancu dispiace à i s’amichi. Vale à dì ch’ellu hè lìberu è ch’ellu s’impone di dinunzià sbaglii, mancanze, debbulezze. U so scopu hè di fà riflette è purtà quelli chì dèvenu cambià di versu. Senza sta voce settimanale, a nostra lotta sarebbe frinata è impedita.
Pè u naziunalìsimu corsu è a custruzzione d’una nazione, Arritti mancherebbe à a lotta s’ellu venìa à smarisce.
Per quessa, avemu bisognu di voi altri, amichi lettori è di u vostru sustegnu. U settimanale campa cù trè base di ricette, e publicità di l’imprese, e paruzioni d’annunzie legali, è l’abbunamenti. Dàteci un colpu di manu, paghendu u vostru abbunamentu ma dinù truvènduci sustegni in più d’imprese pronte à cunfià e so paruzioni publicitarie è di lettori pronti à piglià un abbunamentu. Avete tutti di sicuru, un parente, un amicu chè vo pudete cunvince.
Inseme purtemu stu settimanale sin’à i so 60 anni. Abbunàtevi, leghjite è fate leghje Arritti.
Spartimu inseme Pace è Salute è fede in l’avvene ! •
