U 17 di ghjennaghju scorsu, a Catalogna hà vutatu un attempamentu (moratoire in francese) d’un annata sana nant’à i prugetti di custruzzione di a Costa Brava. Decine di millaie di prugetti sò cuncernati.
A Costa Brava hè a costa nant’à u Mediterràniu di a Catalogna, sposta à tutte e brame immubiliare.
A Generalitata (u guvernu autònomu) ne hà una techja di ssa frebba immubiliare è hà decisu di fà piantà tutte e custruzzioni à menu di 500 metri di u mare.
Chjìbba ! Poca rivuluzione ! Ss’attempamentu hè un sullevu pè i difensori di l’ambiente aduniti in un Cullettivu chjamatu « SOS Costa Brava ». Hà lampatu una chjama à u guvernu catalanu « per luttà contr’à a minaccia nant’à l’ambiente, i paisaggi è a qualità di vita di a Costa Brava ». Dinunzia « l’urbanisazioni spuntànea cù pianificazioni urbane à l’anticogna è sprupusitate », è dumanda « una stragegìa per cambià a classificazione di ssi settori ». Ci vole à dì chì u perìculu hè maiò, sò 30.000 i prugetti in attesa d’un permessu, più scemi l’uni più chè l’altri ! A minaccia pesa nant’à lochi magnìfichi di u liturale catalanu. In Begur sò 260 residenze secundarie in un locu splèndidu di cale, d’elpali, di pineta, contr’à l’accunsentu di u merre è di l’abitanti. 26 appartamenti di lussu sò in custruzzione à cantu, cù vista nant’à a riserva naturale di l’ìsule Medes…. Una sessantina d’altri sò in prugettu in a cala vicina di Sa Riera. In a cumuna di Pals, u merre hè prontu à dà u permessu à custruisce un millaie di case chì s’anu da strughje una pineta centinaria. In Cadaquès, veru ghjuvellu di u liturale catalanu, hè prevista a custruzzione d’una centinaia d’alloghji è d’un albergu. In Palafrugell, 700 àrburi sò stati sradicati senza autorisazione da un prumutore senza vergogna… U liturale catalanu hè u più urbanizatu di Spagna, dice Greenpeace ! A cumuna di Gerona hè stata a prima hà dumandà di piantà e custruzzioni sin’à 500 metri di u liturale. L’attempamentu ùn impedisce micca a reabilitazione di e custruzzioni ch’esìstenu, nemancu l’autorisazioni digià date. U ministeru di u Territoriu è di a Durabilità si dà cusì u tempu di travaglià nant’à un pianu d’urbanìsimu (PDU) di a Costa di Gerona è e so 22 municipalità. U scopu hè di prupone un pianu più durèvule cù classìfica di e terre è accunciamentu di u territoriu. « S’agisce d’un attempamentu preventivu, aspettendu di pudè travaglià à u PDU, per priserve a Costa di l’impattu negativu di certi prugetti » hà dettu u ministru di l’Alloghju, l’Urbanisazione è i Territorii, Agustì Serra. Alluntamentu di i centri urbani, demugrafìa dèbule, mancu di terre, rìsichi naturali, incumpatibilità cù a prutezzione di l’ambiente, impattu nant’à i paisaggi… sò criterii riguardati per elaburà stu PDU.
Di fatti, i merri catalani dumàndanu a messa in ballu d’un Padduc, quandu, in Corsica, i merri corsi u rimèttenu in càusa.
Fabiana Giovannini.
