S’hè spentu u 13 d’ottobre Carlu Laurenzu Angeli, dettu Carlinu, à l’età di 82 anni. Era u ziu di i nostri amichi Norbert Pancrazi è Prete Valery. À e so surelle Maria Antunina è Maria Laura, i so nipoti è niputini è tutti quelli tocchi da ssu dolu, Arritti manda cundugleanze afflitte è fraterne.
Militente di e prim’ore di l’ARC, Carlinu hè statu di tutte e lotte di a ricunniscenza di u nostru pòpulu, a so terra, a so identità. Fù un attore di a leva di u settanta in principiu di u riacquistu, è sparghjìa u so ingaggiamentu di passione è sincerità. Sapìa cunvince è hà cusì tramandatu ssa fede à i soi, cù un stintu paulistu, generosu è schietu.
Innamuratu di a natura, eculugista nanzu à l’ora, era un difensore di a nostra terra è a dimustrava ogni ghjornu da a so gesta cutidiana campendu in armunia cù l’ambiente, à mezu à i so cani.
Era dinù un difensore di a nostra lingua è a nostra cultura, guardianu di u patrimoniu di u so paese di Cambia è u paesolu di San Chìlicu. Tenìa e chjave è fecia scopre u tesoru di e cappelle rumane di San Chìlicu è di Santa Maria. Sintinella è memoria di ssi lochi, riposa à fiancu à ssa muntagna di e Vallerustie ch’ellu tenìa cusì caru.
Sì, a sera, solu à veghja, u passatu chì ci feghja
Sì, in facci’à lu fucone, pusendu cu la pace, l’ùltimu testimone
È campi solu, senza rimorsu, è campi corsu
È pensi schiettu, è pensi forte, è pensi corsu
Sì, in faccia à l’universu, una candella accesa, un pocu di ciò ch’hè persu
Sì, davant’à lu prisente, per l’omu chì si cerca, a verità nucente
Sì, miseria, ma ricchezza, ciò chì lu Corsu era, di stantu è di bellezza,
Sì, quandu fratellu spera, da l’anima prufonda, cum’è un messagieru
È sì a fiara, è sì u lume, è verità
È sì a pace, è sì u core, è benistà
È sì a lotta, è sì a fede, è libertà. (Fiuminale di I Muvrini)