A biera Pietra hè stata premiata da u certificatu d’eccellenza à u famosu «Brussels Beer Challenge », un cuncorsu internaziunale chì ricumpenseghja e biere e più bone di u mondu.
Sta cumpetizione accoglie tutti l’anni e biere di tutti i cuntinenti. Quist’annu èranu 1250 biere raprisentate. Sperti rinumati l’anu paspate è appuntate è, frà tutte, hè a biera Pietra ch’hà vintu u premiu d’eccellenza ! Hè una bella fiertà per un ecunumia cum’è a nostra ! Una bella dimustrazione di rièscita è un bellu incuragime pè i ghjòvani chì bràmanu d’intraprende.
A biera Pietra hè di più in più rinumata in i cuncorsi internaziunali, fruttu di u travagliu è di a passione di i so creatori, Armelle è Dumènicu Sialelli. Macinata in Furiani, a biera Pietra hà festighjatu pocu fà i so 20 anni. L’impresa conta 41 impiecati è pruduce 7500 buttiglie à l’ora. In u 2015, sò stati prudutti più di 72.400 ettolitri di biera per un rivenutu di 16,5 millioni di auri. U marcatu di e biere regiunale cresce assai dapoi parechji anni, ma u so successu Pietra u face in Corsica chì 65% di a so pruduzzione hè cunsummata quì. Si face cunnosce dinù in altrò. 25% di a pruduzzione si vende nant’à u cuntinente è 10% à u stranieru. A biera corsa hè dumandata in i più grandi tavulini ! Sciaccamanate à l’impresa è ventu in puppa !