56% di i Corsi ci anu fattu cunfidenza. Qualessu hè u vostru sìntimu à l’orlu di sta nova mandatura?
D’issi voti, cusì numarosi, ne simu fieri, di sicuru.
È ringraziemu di core l’elettori. Ma ci danu sopra à tuttu una rispunsabilità tamanta. A cunfidenza manifestata di 2015 s’hè allargata assai è nimu ùn pò nigà, oramai, a legittimità chè no avemu per mette in ballu u nostru prugettu.
Issa vittoria, a vogliu dedicà à tutti quelli chì anu cumbattutu pè a Corsica è ch’ùn sò più d’issu mondu. Eppuru, sò sempre à fiancu à noi. A vogliu dedicà à i nostri feriti, à tutte e famiglie sempre in lu dulore, à i nostri prigiuneri è machjaghjoli dinù. À elli chì, parechji anni fà, sò stati ciuttati da una manu indegna in u bughju ghjalatu, à elli chì danu capu à issa sorte ingrata incù un curagiu immensu.
Ch’elli sàppianu chì ùn truveremu mai riposu, fin tantu ch’ùn seranu tutti vultati in Corsica, in casa soia.
Issa vittoria a vulemu sparte dinù incù quelli chì ùn anu vutatu o chì anu vutatu per d’altre liste, chì u paese l’avemu da fà incù tutti i Corsi. E porte di a nazione sò aperte à ognunu.
Aghju vulsutu esse, durante dui anni, u presidente di tutti i membri di l’Assemblea è u mo spìritu serà sempre quessu custì. Maiurità è uppusizione, simu tutti Corsi è appartenimu à un pìcculu pòpulu. Sopra à tuttu, simu liati da una missione à pro di u bè cumunu è di l’interessu superiore di a Corsica.
«Prugettu naziunale, ghjustizia suciale» : avete parlatu in u vostru discorsu d’invistitura d’un «mudelu corsu»?
U nostru prugettu hè naziunale, di sicuru, è dinù suciale, à prò di tutti i Corsi è in particulare di quelli chì cunnòscenu e più grande difficultà.
À quessi, vogliu ramintà u nostru impegnu suciale. À i giòvani, incerti nantu à u so avvene, vogliu dì chè no travagliemu dipoi dui anni per assicurà li, cum’ellu l’hà detta u Papa Francescu: u travagliu, u tettu, a maestria di a terra. À l’anziani, vogliu dì ch’avemu bisognu ch’elli fèrminu in a mossa di Un paese da fà da assicurà a trasmissione di i nostri valori. À l’agenti di a Cullettività, vogliu dì a nostra cunfidenza in e so cumpetenze è a so vulintà di participà à a custruzzione di a Corsica di dumane.
A Corsica chè no vulemu ghjè un paese induve nimu ùn serà lasciatu da cantu. Un paese induve ogni zitellu averà listesse pussibilità di prumuzione suciale quale ella sia l’orìgine o a situazione materiale di a so famiglia.
Hè per quessa chè no vulemu mette in ballu, d’una parte i mezi di u sviluppu ecunòmicu è suciale, è di l’altra un novu sistema educativu. Liberazione naziunale, sviluppu, educazione è ghjustizia suciale sò, è fermeranu, u core di i nostri impegni da custruì u nostru mudellu pulìticu.
Cuntinueremu à travaglià, notte è ghjornu, senza stancià, per fà chì à a fine di issa mandatura a sucietà corsa sia più ghjusta è più bona chì avà.
Ghjustu à puntu avete dettu chì l’educazione hè una priurità di ssu prugettu?
L’educazione hè a nostra prima primura è u sugettu di una di e trè «Cunferenze permanente » ch’aghju lanciatu dopu à l’elezzione di dicembre 2015.
L’educazione, hè u mezu di trasmissione di a nostra làscita culturale è scentìfica. Ghjè u mezu di tesse a lea trà tutti l’attori suciale di dumane è d’anticipà e mutazioni sucetale, ecunòmiche è tennulògiche prufonde ch’averemu da cunosce.
U sistema educativu francese hè sfiatatu.
U mitu di a terza Repùblica hè digià cascatu dopu guerra cù i studii stòrichi. L’ugualità di e scenze, studiata è misurata dipoi l’anni sessanta, pare esse un urizonte di più in più luntanu malgratu e dichjarazioni d’intenzione di i guverni. A ci dìcenu parechji studii internaziunali. Palèsanu dui punti maiò:
– a Francia tene a prima piazza pè a crèscita di l’inugualità ; l’urìgine suciale di i sculari pesa nant’à i risultati di i zitelli è a Scola accresce ancu i scarti suciali iniziali.
– cuntinueghja à calà u livellu di i giòvani, dunque a perfurmenza di u sistema educativu.
Ancu l’inchieste di u Ministeriu di l’educazione s’accòrdanu nant’à sti dui punti.
In Corsica, s’impone stu sistema educativu, è s’ellu ùn esiste micca un studiu specìficu nant’à a nostra ìsula malgratu a dumanda di l’Assemblea di maghju 2017, sapemu chì a situazione hè ancu di più acuta postu chè n’avemu un livellu d’abbandonu sculare superiore à quellu di a Francia è chì l’inugualità sò più forte quì chè in altrò. I nostri giovani sò menu diplumati chè quelli di parechji territorii d’otri mare. Si tratta d’inugualità suciale ma dinù d’inugualità territuriale. S’è ùn femu nunda, a situazione anderà di male in peghju, malgradu i sforzi è e cumpetenze di l’insignanti è di u persunale educativu chì vogliu salutà.
Chì ci tocca à fà per sòrtene?
Aghju dumandatu, in lu 2016, un studiu à u Cunsigliu ecunòmicu suciale è culturale nant’à u sistema educativu in Corsica è l’evuluzioni chì si ponu almanaccà. A cunclusione di u raportu hè chjara: e nostre pussibilità d’azzione per sguassà l’inugualità suciale in core à u sistema educativu sò limitate per via di a nostra dipendenza à e pulìtiche naziunale francese.
Ci tocca à cambià u nostru sistema educativu.
Singapour, per esempiu, era in fondu di a classìfica in lu 1990. Ghjunghje oghje frà i primi, dopu avè trasfurmatu u so sistema educativu, circhendu à favurisce a furmazione di l’insignanti.
I paesi di u nordu di l’Auropa anu sceltu, elli, a rivalutazione di i mistieri di l’insignamentu è di a furmazione, u sustegnu à l’innuvazione, l’autunumia di i stabbilimenti, l’abbandonu di i sistemi tradiziunali di nutazione.
A pussibilità per un paese di pudè valutà da per ellu u so mudellu educativu, definisce e migliuranze è mette le in ballu da per ellu, cunduce à a rièscita di u sistema educativu. Ùn esiste u mudellu ùnicu chì cunvenerebbe à tutti i paesi. Ognunu deve custruì u so pròpriu mudellu.
Ci vole à valutà i dispusitivi educativi à u livellu di a Corsica per custruì pulìtiche educative è di furmazione adattate à e realità è a i bisogni di u territoriu. Hè per quessa chì, annu, l’Assemblea di Corsica hà vutatu à favore di un quadru nurmativu specìficu. Ci deve permette di sviluppà strategie educative ambiziose pè i nostri giòvani.
Ùn ci pò esse emancipazione individuale è cullettiva senza a custruzione di un sistema educativu più ghjustu, più cumpetitivu, più tennulògicu, adattatu à cio chè no simu è direttamente cunduttu da a Corsica. U tema di l’educazione deve esse trattatu durante e neguziazioni cù Parigi.
E quistione educative ùn sò solu cartulari. Sò una parte di noi stessi.
E rilazione incù Parigi pàrenu èssessi migliurate, malgratu u discorsu di Bastia, chì ne pensate?
Dopu à quarant’anni di cunflittu, avemu dui anni fà cuminciatu à scrive un novu capìtulu di a nostra stòria. Quelli chì cum’è noi anu cunnisciutu sti quarant’anni passati sanu u prezzu di a pace, issa pace ch’avemu vulsutu assicurà pè e nove leve. Simu felice di sapè chì i nostri figlioli ùn averanu à passà pè e stonde diffìciule ch’avemu francatu. Oramai, issa pace ùn pò esse rimessa in causa. Da nimu. Ma u raportu di forza pulìticu incù i dirigenti francesi ùn hè compiu. Per un dettu, u discorsu di u presidente di a Repùblica hè statu chjaramente negativu, è ancu custernante.
Cumu avete risentitu ssu discorsu di Bastia?
Emmanuel Macron ùn hà micca presu a misura di ciò chì s’hè passatu in Corsica, ùn s’hè micca messu à u livellu di l’inghjochi, hà parlatu per l’upinione francese è micca per l’upinione corsa. E diceraghju ancu ch’ellu hà parlatu pè a parte di l’upinione francese ch’ùn stà micca à sente ciò ch’elli dìcenu i Corsi. Ancu assai ci sò i presidenti di e regioni, una certa stampa, certi intellettuali, cert’omi pulìtichi ch’anu dettu chjaramente chì a quistione corsa duvìa riceve una risposta pulìtica. Ciò ch’hè statu pusitivu in u discorsu di Macron hè ciò ch’ellu hà presu ind’è i nostri prugrammi messi in ballu da a Cullettività di Corsica. L’Auropa, u Mediterràniu, a furmazione, l’eccellenza ambientale di a Corsica, sò temi chè no trattemu ind’è a nostra pulìtica. Hà fattu sbaglii tamanti in più! Per un dettu a quistione di e suvvenzioni aurupee.
Quandu simu ghjunti à e rispunsabilità, ci era 4% di cunsummazione. Simu passati à 40% di cunsummazione in dui anni ! Invece di ricunnosce chì a nostra manera di fà hè in traccia di richjappà 30 anni di gattiva gestione, vene à facci rimpròveri di u fiascu di i s’amichi pulìtichi! Quand’ellu parla dinù di i 400 millioni di u PEI, ci piglia per imbecilli. I Corsi sanu bè ch’ella era prevista cusì nanzu ch’ellu ghjunghji à e rispunsabilità. Infine chì, ùn era micca un discorsu à un livellu presidenziale!
Puru sò principiate e discussioni cù Jacqueline Gourault, induve ne site?
U tempu di e discussioni hè cortu ma un finestrinu s’hè apertu in a pussibilità d’ottene un artìculu in a Custituzione chì guarantisce à a Corsica a pussibilità d’un addattazione permanente à e lege è regulamenti. Ma mi ci vole à precisà qualchi puntellu per raportu à certe dichjarazioni d’usservatorii o d’eletti.
L’Assemblea di Corsica ùn hà mai dumandatu à fà entre a Corsica in u quadru di l’artìculu 72 di a Custituzione francese. L’Assemblea hà vutatu, in u 2013, u principe di a creazione d’un artìculu 72-5. Vale à dì un artìculu specìficu parte sana. U raportu Mastor ùn hà micca dumandatu d’intruduce una menzione particulare ind’è l’artìculu 74. Prupone un artìculu distintu chì puderebbe chjamassi 74-2 per un dettu è chì permetterebbe à a Corsica di benefizià d’un statutu d’autunumìa legislativa in i duminii ch’ella abbisogna. Infine, a Nova Caledonia ùn rileva micca di l’artìculu 74 mà d’artìculi sfarenti è ancu d’un tìtulu distintu!
Vogliu dì chì u dibàttitu ùn si pò riassume trà l’artìculu 72 è l’artìculu 74. Parlemu di u 74 cum’un esempiu di ciò chì si puderebbe scrive pè a Corsica. Ciò ch’imprema hè u cuntenutu di l’artìculu è micca u so nùmaru. L’inghjocu essenziale di a neguziazione attuale hè di strappà, in grazia à ciò chè no prupunimu, i mezi di trattà à traversu misure specìfiche, i prublemi cuncreti di i Corsi in i duminii di a fiscalità di u patrimoniu, di un statutu fiscale è suciale, di u fundariu, di l’ambiente, di a lingua, di l’educazione, di l’impiecu, di a salute, ecc.
Pensate chè no ci ghjnghjeremu?
Simu sereni perchè chì simu più forti chè mai è chì a nostra forza ghjè u pòpulu corsu chì a ci dà. Nantu à u tavulinu di e discussioni ci hè u nostru prugettu, un prugettu pruvistu d’un sustegnu demucràticu massicciu.
Dipoi anni è anni, da mare in là, certi presèntanu a nostra lotta cum’è una dimarchja antifrancese. Eppuru ùn hè mai statu u casu. Tutti i patriotti custretti di dì « innò», in ogni èpica è in ogni paese di u mondu, l’anu fatta per amore di i soi è micca per odiu di l’altri. Simu noi, appassiunati di issu pìcculu pòpulu chì ghjè u nostru è chì ùn hà mai purtatu tortu à nisunu. Un pòpulu chì vole campà, in fratellanza incù tutti l’altri pòpuli in giru à ellu, in u Mediterràniu, in Auropa è al dilà. Hè per quessa chì, in e discussioni, vulemu ragiunà incù a Francia di Victor Schoelcher, di Pierre Mendès France è di Michel Rocard. Una Francia degna di rispettu è –perchè ùn dì la micca?– d’amicizia. Ma l’amicizia ùn hà nunda à chì vede incù a sottumissione. L’amicizia si custruisce in un raportu d’uguale dignità.
Per contu meu, sò cunvintu chì e donne è l’omi di bona vulintà si ponu sente è accurdà si.
Dite chì u «drittu à l’autodeterminazione hè drittu à a felicità». Spiecàteci…
Avemu fattu tuttu dipoi u nostru accessu à e ripunsabilità per cunduce a Corsica nantu à a strada di a mudernità pulìtica. Ma ùn ci scurdemu di u tempu chì fù, è in particulare di u sèculu di Paoli, u nostru sèculu d’oru.
U preambulu di a Custituzione di u 1755 hè un tesoru d’innuvazione pulìtica : «A Dieta generale di u pòpulu corsu, legittimamente maestru d’ellu stessu, cunvucata da u Generale secondu e mudalità stabilite in a cità di Corti i 16, 17 è 18 di nuvembre 1755. Avendu ricunquistu a so libertà è bramendu di dà à u so guvernu una forma durèvule è custante sottumettendu lu à una custituzione capace à assicurà a felicità di a Nazione».
Per noi naziunali, issu preambulu, sempre d’attualità, custituisce u testu ghjurìdicu u più altu ch’ellu ci sia. In sei fìlari, solu sei fìlari, nàscenu quatru nuzioni sfulgurante.
A prima, quella di «custituzione», dunque di lege fundamentale, chì l’altri pòpuli aurupei ùn l’avìanu à l’èpica. A seconda, quella di «nazione» in u so sensu oghjincu: una cullettività pulìtica unita, è micca solu cum’è nanzu un inseme di nativi o d’uriginarii d’un territoriu.
A terza nuzione, u drittu di u pòpulu à l’autodeterminazione : «A Dieta generale di u populu corsu, legittimamente maestru d’ellu stessu.» Nuvità à quella èpica, ma idea sempre d’attualità oghje ghjornu, scritta in u prugettu di Pè a Corsica è dunque riaffirmata da i Corsi u 10 di dicembre scorsu. Infine, a quarta nuzione, u drittu à a « felicità », cuncettu chì si ritruverà dopu in li testi custituziunali americani è aurupei.
À mè, issi dui ùltimi dritti –u drittu di sceglie u so destinu è u drittu à a felicità–, mi pàrenu più chè liati, per ogni pòpulu, è dunque pè u nostru.
È per quessa chì, a vogliu dì per compie, di modu sulenne : ùn accetteremu mai di rinuncià nè à l’unu, nè à l’altru, chì nisun’pòpulu ùn pò fà u dolu di a felicità.
Or dunque, a dicu à tutti i vostri lettori, campate felici !