Circate di figuravvi à Bastia ind’i tempi. Cacciate e vitture, e strade in catramu, i casali muderni. Imaginate a cità cù u so centru : u Vechju Portu è A Marina (Terra Vechja), a Citatella (Terra Nova), San Ghjisè, U Mercà.
Imaginate a so periferìa campagnola : in Lupinu è in a valle di U Fangu ci sò i giardini è l’orte cù e so lenze, e so casette, e so aghje, i so mulini.
Imaginate stu spaziu cù i so lochi di fede, cappelle, lochi di pelerinagiu è oratorii : Monserratu, San Gaitanu, Sant’Antò, E Capanelle.
Infine, pensate à e so furtificazioni : i forti di A Croce (diventatu u « Fort Lacroix »), è quellu di Monserratu (induv’ellu c’era u castellu di Belgudè), e torre di a Vètrice (vicina di Cardu) o quella di A Falcunaghja (in Lupinu).
È per circulà in stu spaziu, una rete di chjassi, di ricciate, di viòttuli.
Qualchidunu ci hè sempre. S’è vo ùn i cunniscite micca, lasciate a vostra vittura induv’ella hè. Partite à spassu, pisate u capu. «Bastia hè una cità strana » scrivia Sebastianu Dalzeto in Pesciu Anguilla. Pigliate u tempu di fidighjalla, chì Bastia hè bella…
A Filippina hè a via chì colla da l’entrata di a Citatella à Sant’Antò.
San Ruccucciu, o in bastiacciu «San Ruccù ». Parte da San Ghjisè per ghjunghje à A Croce (diventatu « Fort Lacroix »)
Trà u Tribunale è A Filippina, in piena cità vi si pare d’esse in paese.
Da Lupinu à Monserratu, à dui passi di i casali novi è di l’HLM, si scòprenu e tracce di u mondu « di nanzu ».
Da cullà in Cardu, trà Monserratu è A Vètrice.
Perchè micca una riabilitazione ?
Pè i lucali (è puru i turisti), sti chjassi sò una carta maestra per scopre e bellezze di Bastia. Certi meriterrèbbinu d’esse puliti è intrattenuti (ùn parlemu mancu di u spaziu pùblicu chì hè statu privatizatu in certi lochi…).
Un ghjornu, forse ?