Dopu una bella zitellina in Niolu, unta di spìritu è d’ànima corsa chì li daranu l’amore di a terra, di u paese, di e so tradizioni, a so cultura, a so lingua, un identita arradicata, Edimondu parte cù u so fratellu Màssimu à fà i so studii in Cuntinente. Hè culandi ch’elli scòprenu u cuntrastu d’una vita di misèria in Corsica, malgratu e so richezze, di pettu à ciò ch’ellu si passa in Francia, trà l’infrastrutture è i mezi dati à u sviluppu culandi è i tràmpali è l’inghjulie quindi.
À vint’anni, scontra quella chì serà a so moglie è a mamma di i so dui maschji, ma ancu di più, una cumpagna di lotta. S’ellu hè militente regiunalista, à l’èpica u babbu di u naziunalìsimu cuntempuràneu, Lucìa hè militente di manca, ghjudea, figliola d’immigrati pulunesi stallati in Alsazia, è ssu bellu mischiu trà u Corsu è a ghjudea chì sà ciò ch’elle sò e persecuzioni, ammaneghja un andatura pè u coppiu unta d’umanìsimu è d’amore di a libertà è di a ghjustizia.
Lucìa cunterà assai in a so vita d’omu, ma dinù in a so vita militente.
L’impegnu d’Edmondu nant’à u cuntinente, li darà dinù a cunvinzione mai sfiatata di u pesu ch’ella hà a diaspora è i Corsi à spalluzzera. Fonda in u 2004 Corsica Diaspora chì conta oghje millaie di membri in centinaie di cità.
In u 1964, Màssimu, vultatu in u 62, Paulu Marcu Seta è Iviu Le Bomin fòndanu u Cedic (Cumitatu di studii pè a difesa di l’interessi di a Corsica) è dinùnzianu digià u rìsicu di sparizione di l’etnìa corsa. Edmondu ci partecipeghja. Hè spurtivu è u bràmanu parechji club prufessiunali di ghjocu à pallò frà i quali l’OM, ma a so voglia di vultà in Corsica è d’impegnassi pè a so ìsula hè più forte.
Volta in u 1965, è si stalla cum’è duttore, specialista gastro enterulogu. U so fratellu hè duttore generalista. Fòndanu inseme l’Azzione Regiunalista Corsa in u 1967 chì dinunzia u sustegnu à i rapatriati d’Àfrica di u Nordu, quandu i Corsi sò spugliati da a so terra. Dopu à u ricusu di e prove nuclearie in L’Argentella in u 1969, l’affari di e fanghe rosse porta Edimondu in prima lìnea.
A Montedison pullueghja u Mediterràniu cù prudutti chìmichi. Hè a prima di e lotte eculugiste in Corsica. Edmondu serà unu di i primi imprigiunati pulìtichi per vìa di ssa rivolta in u 1973. Hè liberatu 10 ghjorni dopu à manifestazioni maiò è ghjurnate « Isula morta ». Simu in tempu di riacquistu pè a lingua è a cultura corsa, per l’arte è i sapè fà paisani.
Nàscenu « L’università d’Estate ». L’ARC scumbatte nant’à tutti i terreni.
In u 1971, l’ARC dinunzia l’affare di l’Hudson Institute chì vole sviluppà un turìsimu di massa. Màssimu Simeoni scrive nant’à Arritti un edituriale : « Sò naziunalistu corsu ». Hè una tappa francata per Edimondu è tutti i militenti di l’èpica. U 24 di nuvembre scorsu, quand’ellu hà ricevutu u premiu Coppieters per salutà a so vita militente, Edimondu hà vulsutu ramentà st’artìculu ch’hà marcatu a so vita. In u 1974, l’ARC diventa Azzione pè a Rinàscita di a Corsica è publicheghja «Autunumìa », un libru prugettu chì dumanda un statutu d’autunumìa larga è cumpletta pè a Corsica.
L’Università d’estate pòstanu nant’à u Palazzu Naziunale in Corti un pannellu chì decreta ch’ella hè riaperta l’Università di Corti.
Aostu 1975. Edimondu Simeoni cù una mannata di militenti occupeghja una cava di vignaghjoli scrucconi per dinunzià e derive di a vinaccia. U Statu accampa a cava cù 1500 guardia mubili, eliccòtteri è currazzati, pò urduneghja l’assaltu senza discussioni. Dui pulizzeri sò tombi, un militente hè gravamente feritu. Edimondu si rende è i so cumpagni pàrtenu cù e so arme. U Cumitatu contr’à a Ripressione hè creatu per dumandà a liberazione d’Edmondu.
U so prucessu di pettu a Corte di Sicurezza di u Statu averà una risunanza internaziunale cum’è l’evenimenti d’Aleria, è porta a prova ch’ellu ùn era per nunda ind’è a morte di i gendarmi.
Hè cundannatu à 5 anni di prigiò cù dui attempati è serà cappiatu dui anni dopu, di ferraghju 1977.
U 14 di lugliu 1977 partecipeghja à a creazione di l’Unione di u Pòpulu Corsu.
Tutta a so vita tenerà à mente ssu scopu: fà l’unione di u pòpulu !
Un annu nanzu, u 5 di maghju 1976, hè creatu u FLNC, Edmondu scumbatterà senza sfiatà contr’à a scelta di a viulenza clandestina. In principiu di l’annate 80, sempre cù u so fratellu Màssimu, discute cù u Statu francese per circà di custruisce a pace. Hè torna una custanza di a so vita, ferà sente a so voce à ogni mumenti induv’ellu si dibatte un novu statutu (Statutu Deferre in 80, Statutu Joxe in 91, processus Matignon in 2002).
L’elezzione di François Mitterrand in 1981 porta l’aministìa, u statutu particulare, è l’apertura di l’Università Pasquale Paoli. Edmondu internaziunalizeghja u prublema corsu, cù cunferenze di stampa à u parlamentu aurupeu o in Corsica, cù i primi passi di l’ALE in u 1979, in Bastia. Hà una fede tremenda in un Auropa di i pòpuli da custruisce.
In u 1982, cunduce una lista autunumista pè a prima elezzione di ssu primu statutu. Cù 7 eletti, hè una bella vittoria ma ùn pò accettà a manu tesa di Prosper Alfonsi per custituisce una maghjurità di prugressu, chì i Cumitati Naziunalisti è u FLNC dinùnzianu « una tràppula ».
In u 1983, hè toccu da a malatìa è deve demissiunà di l’Assemblea. Puru ùn piantà u so militentìsimu è l’iniziative pùbliche da tutte e mamme.
In u 1987, face u so mea culpa è chjama à tutti i prutagunisti di a quistione corsa à fà listessu.
Disgraziosamente, nimu ùn averà u so curagiu chì pudìa apre e porte d’un novu dialogu.
Tutte st’annate scumbatte nant’à tutti i terreni, Edimondu hè un militente naziunalistu, ma dinù un militente di tutte e càuse ghjuste, pè a lingua, per l’ecunumia, contr’à a froda è pè a demucrazìa, contr’à i fochi, pè a salute, pè a diaspora, pè a piazza di e donne, contr’à u razzìsimu, contr’à a précarità, contr’à a viulenza, pè a liberazione di i prigiuneri… sin’à i so ùltimi ghjorni scrive, scumbatte, struttureghja, cuncepisce.
In l’annate 90, soffre di l’affrontamentu fratricidiu trà naziunalisti è dinunzia a viulenza più chè mai.
Partisgianu d’un dialogu cuntìnuu, travaglia puru à ch’ella pianti, sin’à l’arrestu definitivu di a clandestinità in 2014.
In u 1998, rivene nant’à a scena eletturale ma a lista ch’ellu cunduce fiasca per pocu (42 voti) per vìa di frode massive.
L’elezzione hè annulata da u Cunsigliu di Statu, ma u muvimentu autunumista si spicca è Edimondu si ritira. Cù trè liste, u naziunalìsimu dettu demucràticu fiasca torna è s’àprenu annate diffìciule dopu à l’assassìniu di u prefettu Erignac. A ripressione hè tremenda.
In 2004, prova torna una pulìtica d’Unione Naziunale. A so lista vince 8 eletti, ma l’indipendentisti ripìglianu l’attentati.
Hè torna un fiascu per l’unione.
In 2008, à e municipale bastiaccie, dopu à tanti strazii, u naziunalìsimu principia à sbuccà. In 2010 l’elezzioni territuriale cunfìrmanu. Pò l’aurupeane, pò e legislative, è infine, una vittoria tamanta: u so figliolu, Giliu vince e municipale in Bastia in 2014.
In 2015, pò in 2017, l’elezzioni territuriale accèrtanu torna a crèscita di u naziunalìsimu corsu, maghjurità rilativa, pò maghjurità assuluta, a rivoluzione demucràtica ch’ellu hà tantu sunniatu hè in marchja.
A vita militente d’Edmondu Simeoni conta i 60 anni di lotta di u pòpulu corsu. Ùn hà mai sfiatatu è s’hè impegnatu nant’à tutti i terreni di a lotta, circhendu d’inditala sempre nant’à a strada di a demucrazìa. A pèrdita è u dulore sò immensi pè u pòpulu corsu.