«In Corsica, a divagazione animale, a sapemu, hè a cunsequenza d’un sistema d’allevu ch’hè statu troppu suvente incuragitu, sustenutu è finanzatu »… hà dettu Marcellu Cesari di u gruppu Femu a Corsica, merre di A Riventosa, stu ghjovi 29 di ghjugnu per dinunzià ssu lascià corre. « L’agricultura chè no vulemu noi pè u nostru paese hè una agricultura di pruduzzione, rispettosa di l’ambiente, di u so patrimoniu biològicu, di i so sapè fà… numarosi sò i pastori è l’agricultori ch’anu fattu ssa scelta. Cusì, fàcenu campà e scole, i cumercii di i paesi, a ruralità in generale. » Puru, dinunzia torna u nostru amicu :
«ùn si passa una settimana senza cunnosce un dannu fattu da a divagazione animale, struttu i spazii naturali, u pìcculu patrimoniu custruitu, i campi santi… più gravi, l’accidenti stradali o e personne incurniate ! »
Un annu fà, si tumbava l’amicu Clàudiu Cesari, fratellu di Marcellu, in un accidente di mottò incù una vacca… «Ùn pudemu aspettà torna un attualità dramàtica per dà di pettu à ssa calamità. » Dumanda Femu a Corsica ch’ella sìa data à i merri a pussibilità di tene e rispunsabilità amministrative, cìvile è penale chì sò e soie. È di pudè spàrtele cù i servizii di u Statu, l’urganìsimi in lea cù l’agricultura (Odarc, Càmere d’agricultura, sindicati, associi…) da ch’ella sìa incuragita una vera riflessione nant’à u fondu. In fine cù a Cullettività Territuriale ch’hà a rispunsabilità di e strade, da pudè securizale. Marcellu Cesari ramenta e misure prese nant’à u cuntrollu di l’aiutu di a Pulìtica Agrìcula Cumuna. Dumanda chì u sustegnu ùn sìa pussìbule chì dopu à un cuntrollu nant’à a spluttazione per rèndesi contu chì u pastore o u vaccaghju ammaestra cum’ellu si deve u so bestiame. U prublema face anni è anni ch’ella duri. «Hè cumplicatu, ma a sucietà ci chjama à regulalu » dice torna Marcellu. Hà dumandatu à u presidente di l’Odarc, Francescu Sargentini l’urganisazione d’una cuncertazione cù un calendariu di riunioni da «mette fine à ssu modu d’allevu chì strughje, chì ferisce, è chì tomba. » In a so risposta, u presidente di l’Odarc dinunzia a pulìtica d’abandonnu di i nostri paesi di l’internu è u mancu di sustegnu dapoi anni pè a nostra agricultura di muntagna parte di u guvernu francese. A pulìtica di u fundariu, l’indivisione, u sustegnu chì s’assumiglieghja à un aiutu suciale ùn ponu fà un agricultura di pruduzzione. À ssu rìtimu si n’hà da more a nostra muntagna ! Hè stata decisa a messa in ballu d’un pianu repressivu, di sicurisazione di e strade, è di sensibilisazione di l’eletti, di i pastori è vaccaghji è di a pupulazione in generale. U scopu hè di « favurizà l’allevu di muntagna, da furmà ghjòvani agricultori, d’adunìsceli in un prugettu strutturente ch’hà da permette di prufiziunalizà u mondu agrìculu. » Hè d’accunsentu l’Odarc per mette in ballu una grande cuncertazione è cuntinuà di travaglià à una PAC megliu definita,
«da custruisce un agricultura muderna ch’hà da risponde à i bisogni di u nostru pòpulu, per dà un antra imàgine di i nostri pastori è vaccaghji ! »