Cum’è tutti l’anni, ci seranu une poche de manifestazioni spaperse in tutte e rugioni per festighjà l’8 di dicembre, festa di a Nazione corsa. In Lìsula, in Conca, in Corti, in Bastia… salutemu tutte l’iniziative ! Bona festa à tutti !
In Conca
Ogni annu, l’associu A Punta di l’Ortu urganizèghja evenimenti per festighjà l’8 di dicembre. Quist’annu serà un pocu di più particulare cù messa, prucessiò, granìtula, serata cù u ballu di a Muresca è canti corsi è baschi. Face 20 anni chì l’8 di dicembre hè festighjatu in Conca. A punta di l’Ortu, creatu appostu, animatu da Micheli Leccia, hè ghjunta un associu ch’opereghja à longu à l’annata è fà chì i Corsi impàrghinu a so stòria ! A vuluntà hè di tuccà aldilà di u paese. Hè cusì ch’elli anu fabricatu è sparsu una bandera maiò, vista da luntanu.
Evvica a festa di a Nazione in Conca !
In Lìsula
U Cumitatu Lisulanu celebreghja anch’ellu l’Immaculata Cuncissione i 7 è l’8 di dicembre. L’associu onoreghja la Madonna, padrona di a Nazione corsa, à longu à dui ghjorni.
U vènari 7 di dicembre in a sala di u Spaziu à 6 ore è mezu di sera, un spetàculu stòricu «Memoria di u Babbu » hè ghjucatu cù a squadra di Benjamin Casinelli. Pò mostre di documenti stòrichi, sempre à u Spaziu, cù l’aiutu di a merìa di Lìsula, l’associu Spìritu Paolistu, u u Cumitatu Lisulanu. L’8 di dicembre ci sarà una messa à 6 ore di sera, in a ghjesgia di l’Immaculata Cuncessione, seguitata ver di 7 ore, da a prucessiò. Ghjunti à a stàtua di u Babbu, a prucessiò si pianta per rimette. Dui zitelloni di u Cullegiu di a Balagna, leghjeranu in lingua corsa, pezzi di u regulamentu di u 30 di nuvembre, di ghjennaghju 1735.
A ghjurnata si cumpierà sott’à u tendone nant’à a piazza Paoli, per una veghja cù i canterini di Los Fragigos del Diablo. Ci sarà da beie è da manghjà.
Hè gràtisi per i zitelli è si dumanda una participazioni pè e spese di 15 auri pè i maiò. Venite numarosi !
In Corti
L’Università Pasquale Paoli, cù a partecipazione di i sindicati studientini, CGC, GI et GP, invita à una sfilarata di « I Naziunali ». Parterà à 3 ore da a merìa di Corti. À 4 ore, Alinu di Meglio, Eugène Gherardi è Sebastianu Quenot feranu lettura à u Palazzu Naziunale, di currispundenze di Pasquale Paoli è seguiterà un dibàttitu nant’à u tema «Nazione d’eri, Nazione d’oghje ».
À 6 ore, a tradiziunale messa cantata in chjesa di l’Annunziata, pò si cumpierà cù un spuntinu è una veghja piazza Gaffory. Aiò Curtinesi, venite à festighjà !
In Bastia
A festa di a Nazione casca à tempu cù a quinta edizione di u City Trail, o Spassighjata, a corsa di notte in i carrughji bastiacci chì cunnosce un bellu successu ogni annu. Hè l’associu Mantinum chì l’urganizeghja. S’aspetta più di 1800 spurtivi, 1200 à corre è 600 à marchjà, cù una centinaia di zitelli in più. L’urganisatori, Fedèriccu Raffaelli è Cyril Giuntini feranu passà a corsa quist’annu in Sant’Antone cù u caminu di San Ruccuciu cù «quattru obbiettivi maiò : u patrimoniu è a cultura, a religione, a sulidarità è u sport .» «Pè a prima volta, a corsa casca u ghjornu di a Festa di a Nazione. Eccu un bellu sìmbulu !
Avemu assuciatu e cunfraternità di a cità, a ghjente chì partecipeghja à a corsa seranu benedetti nanzu di parte, è u Dìu serà cantatu. À a veghja, Anghjulu Antone Pietrera, sturianu, invita à una cunferenza nant’à a Festa di a Nazione. » A corsa di i zitteli si ferà nant’à a piazza San Niculà. Si darà à tutti quelli chì còrrenu un lèssicu in lingua corsa. «Hè un travagliu magnìficu fattu da u serviziu di a lingua è a cultura corsa », spieca l’aghjunta à a lingua corsa, Mattea Lacave. « Fattu da Rumanu Giorgi, quelli chì còrrenu puderanu cusì leghje i nomi di i carrughji o sapè cum’ellu si dice tèrmini tènnichi. Ci sò uni pochi di fiure di Battì è di Marcè Lepidi ». A spazzighjata parterà à 6 ore di sera à longu à 9,3 chilòmetri.
L’associu Mantinum aiuta ogni annu un òpera caritativa. Quist’annu hè a casa di u Core Sacru di Ghjesù chì accoglie e famiglie ch’anu ghjente uspitalizati. Ci saranu une poche d’altre iniziative in Bastia. Cunferenze, dibàttiti, attelli d’amparera di chjam’è rispondi, scuperta di u patrimoniu bastiacciu, di a cultura. Pò un grande cuncertu pè i ghjòvanni di u secundariu si tenerà à u Centru culturale l’Alboru, cù Diana di l’Alba.
L’8 di dicembre hè festa di tutti i Corsi, sìate numarosi à partecipà à l’evenimenti chì si fàcenu ind’è voi !