S’hè spenta Joëlle Tomasini. Avìa 65 anni.
Militente fida di l’eculugìa, Joëlle era una donna di finezza è intelligenza. Una donna di cunvinzione è di cumbattu, pè a Corsica, pè a pianetta, pè a natura. Prufissore di spagnolu, cultivata è ingorda di cultura, purtava sempre à apprufundisce e cunversazioni è i dibattiti.
S’hè impegnata più cuncretamente in pulìtica à u senu di I Verdi Corsi dopu à avè allivatu i so figlioli cù Jean Graziani cù quale hà campatu una grande parte di a so vita. Disgraziosamente, ùn hà pussutu prufittà di a so ritirata, di pettu à a malatitaccia ch’ella hà affruntatu cù forza è curagiu à longu à parechji anni, senza lagnassi per prutege i soi.
Era a mamma di i nostri amichi Maia, ghjurnalista à France 3 Via Stella, è Matteu, artisgianu luttaiu.
À i so figlioli, à tutti i soi adduluriti, Arritti manda cundugleanze afflitte è fraterne.