Incù gravità, affezzione é cunfidenza, m’addirizzu à voi tutte é tutti, militenti, simpatigianti, corsi assitati di demucrazia, di pace é di libertà, Corsi di l’isula o ind’è diaspora, chi voi siate d’origine o d’addutazione ; qualchi sianu a vostra religione, e vote idee pultiche, u vostru statutu suciale. Ma chi avete tuttte é tutti in cumunu a passione di a Corsica, di a so tarra é di i so lochi, di a so cultura, di u populu corsu…. A passione di a demucrazia é di a ghjustizià
Chi ghjunghjimu oghje à a strinta di u saccu, à un crucivia periculosu ch’ellu ci vole à francà pianamente é bè per pudè piglià, inseme é senza pinseru, a strada di l’avvene.
A gravità perchè ? Perchà nostra storia, difficile, turmintata, ùn n’hè ancu compia é chi u periculu hè sempre a meza casa. Giratevi in daretu é vidarete chi simu un populu chi lotta dapoi seculi é seculi, pè a so identità, chi lotta pè a so libertà, contra l’oppressione é l’inghjustizia. Ci vole a crede ch’ellu c’hè un segnu, una vulintà. di resistenza cullettiva chi barca l’epiche é i seculi . A situazione attuale face seguità à cinquant’anni do lotta arrabiata, – tra di a Francia é noi- incù tantu strazi, tante suffrenze, tantu danni, tantu castighi chi solu a fede ind’ à nostra nazione- si vene à di un populu, una tarra, una cultura, una vulintà di fà é campà un avvene cumunu- ha permessu di supranà e forze di a duminazione di a culunisazione, u Statu francese é u clanisimu, accuppiati é complici.
In 2010 avemu vintu a merria di Bastia incù e forze di prugressu ; in 2015 a Cullettività Territuriale, in 2017 trè alizioni legislative nant’à quattru. Oghje a Corsica ha a Presidenza di a Cummissione di l’Isule di l’Auropa, per strappà misure specifiche é ghjuste per 25 millioni di personne !! Capite bè chi u Statu é tutte forze reaziunarie é cunservatrice di Corsica é aldilà, ùn ponu accità issa mossa cullettiva ver di a libertà chi c’aspetta ; é ognunu capisce ch’elli hanu u prugettu di mettesi tutt’inseme contra noi. Hè chjara oramai. Aprite l’occhji chia malfatta si pripara. Per arradicà u sistema culuniale e clanistu chi ci ha arruvinati.
M’addirizzu à voi incù affezzione e fratellanza ; é ci possu pratende chi, dapoi 1960, dunque cinquanta sett’anni, simu stati inseme ind’è tutte e lotte pulitiche, culturale, ecologiche, economiche é suciale ; ind’è tutte e lotte pè a demucrazia, a pace, a ghjustizia, à fratellanza incù tutti i populi ; senza viulenze, senza razzisimu. Avemu scumpartutu angoscie é sperenze, strazi é vittorie ; tutta nostra mossa hè stata impastata di a vulintà feroce d’un cede manc’u palmu di tarra senza luttà, mancu un metru di libertà, incu a passione di ragiunà incù tutti, ind’è u solcu di a demucrazia é di l’etica.
M’addirizzu à voi tutte é tutti incù cunfidenza perchè simu tutti i figlioli di seculi di generazione di donne é d’omi, degni, onesti, travagliatori ; chi maî ùn n’avemu traditu u versu maestru di a notra lotta – u populu, a demucrazia, a libertà- ; m’addirizzu à voi pa ramintaci inseme tutti quelli chi so partuti ; perchè simu arrimbati à u dirittu internaziunale é chi a nostra lotta hè lighjitima é ghjusta.
Vinite in Corti u 15 d’Ottobre, a dece ore é mezu à Chabrières, per creà un grande muvimentu democraticu, d’emancipazione chi a Corsica aspetta « Femu a Corsica », partitu di Guvernu, d’apertura, sottu una rivindicazione chjara, sputica : Un statu d’Autonomia interna, ind’è a Republica francese ».
A dumane
Duttore Edimondu Simeoni
Aiacciu 10 d’Ottobre 2017