«Dapoi a so creazione in u 1972, l’associu « Ricordu di Ponte Novu » urganizeghja a cummemurazione di a Battaglia di Ponte-Novu di l’8 è u 9 di Maghju di u 1769. Sti ghjorni, impurtantìssimi ind’a noscia Storia, hà sugellatu u destinu pulìticu di a Nazione Corsa indipendente, assuciendu la à u Reame di Francia.
Bellu luntanu d’una vulintà di festighjà o di recuperazione pulìtica, u nostru associu tene à participà à a ricunniscenza d’un patrimoniu stòricu è culturale maiò, ma dinò à mantene a memoria di u sacrifiziu di i patrioti corsi, cascati pè a libertà.
Al di là di l’aspettu cummemurativu di sta ghjurnata, u nostru associu s’impegna à trasmette a Stòria di a Corsica. »
Eccu cum’ellu si sprimava l’Associu di u Ricordu di Ponte Novu per chjamà à l’adunita di Ponte Novu torna quist’annu. Cum’è tutti l’anni era presente per tramandà st’evenimentu, è fà chì e nove generazioni ripliglièssinu u fiatu, da ùn scurdassi mai u sangue di i patriotti ch’hà corsu in ssi lochi. Quasi un mezu sèculu, chì ss’associu ci ramenta a nostra stòria cù cunferenze è animazioni vàrie. U so mèritu hè grande è i più anziani si ponu ramentà l’impegnu di l’amichi oghje spariti Nunziu Grisoni, Elice Guerrini, Bartulumeu Dolovici… Cù elli dinù, Prete Mondoloni era di i primi à impegnassi.
M’arricordu di i mo primi passi in Ponte Novu ind’è l’annate ottanta. Per mè, ghjuvanetta tandu, Ponte Novu era mezu di scuntrà tutti st’anziani militenti chì ci anu indidata a strada è cuntinuèghjanu à tramandaci a nostra stòria più cuntempurànea.
U ponte ferma sempre oghjeghjornu ssa lea trà e generazioni di militenti. Una magnìfica lea da tramandassi à fiara di a nazione corsa in pettu. U ponte, nu e vite di l’omu in generale, tene a simbòlica di u passagiu, a transizione, a trasfurmazione. Leame trà dui lochi, permette, dìcenu i suciologhi, a cicatrisazione, a pace, u scambiu… nu a mittulugìa avvicina dinù u cielu è a terra, u cusciente è l’incusciente, a vita è l’aldilà.
Nu a forma d’un arcu, hè simbolu di divinità è di rinnovu di a creazione di u mondu. U Papa, per un dettu, hè dettu puntefice suvranu, pontifex maximus grande custruttore di ponte! Si ritrova quì a lea trà e nostre vite è u paradisu. U nostru, u ponte hè struttu è si pianta di pettu à Golu chì falla impassìbile ver di u mare, permettendu d’ammentassi quand’ellu falava rossu di sangue. È a simbòlica si rinforza firmendu ssa lea trà e generazioni è ssa brama di pace è di custruzzione d’una nazione lìbera è degna. Un appuntamentu induv’omu và à rifiatassi. Un altare sacru.
Fabiana Giovannini