Una vucione corsa s’hè spenta ssu 13 di maghju 2020. Nativu di Castellu di Rustinu, Richard Girolami avìa 74 anni. Hà scrittu frà e cumpunizione è e meludìe e più spùtiche di u ripertoriu isulanu. Un veru artistu ch’hà partecipatu à custruisce u cantu corsu. Hà fattu i so primi passi in u gruppu di i Machjaghjoli in l’annate 70 è cantendu dopu in u celebru Son des guitares in Marseglia. Eppò si mette à scrive anch’ellu, mùsiche è rime per dì u s’amore di u so paese è i so valori, a so nustalgìa di e tradizioni. Nunda di tristu, à le volte ancu scherzosu, u scopu hè di tuccà l’ànima di a ghjente in ciò chì ci adunisce tutti, a nostra natura è a nostra cultura cusì bella.
Autore, cumpunitore, interpreta, ci hà purtatu in cantu, mùsica è puesìa à longu à quasi 50 anni d’una manera cusì particulare, chì li era pròpia, mettendu in cantu a Corsica, u nostru esse è a nostra vita cutidiana. Un parullaghju di prima trinca. A più cunnisciuta di e so canzone oghje per vìa ch’ella hè a più recente, hè Muntagna, bellìssima addattazione di l’òpera di Jean Ferrat, ma ci hà rigalatu cusì tante belle canzone, cume Un ìsula, Baccalà, Ricordu di Munticellu, u plaffò, U Corsu americanu, l’ordinatore, a Vechja Mamma, a Voce di Bastia, o Sgiò Merre, Ci era… è tant’altri canti di cusì belle rime, stòrie è meludìe, ch’anu sublimatu a lingua corsa, carche di tenerezze è stampe vive di cultura è di stintu corsu.
Era cusì un cumpunitore apreziatu è ancu ricercatu. Hà scrittu per uni pochi d’artisti corsi di rinomu cum’è Antone Ciosi, Yana Ricci, Maryse Nicolai, I Fratelli, Tina Marchesi, José Suzzoni… Era dinù un realisatore di spetàculu apreziatu. Hà cumpostu è urchestratu a scenografìa d’uni pochi di spetàculi cum’è a battaglia di Ponte Novu, ma hà accumpagnatu dinù uni pochi d’altri spetàculi è festivali istatini, sunurizendu è accunciendu serate nustrale, di jazz o di varietà. Hè dinù ellu ch’hà furmatu è urchestratu u gruppu Cor’di Rustinu cù bellìssime canzone cum’è Loghje, A Cardellina, I Frati, Cantemu, Ci vole à lascià dopu à sè, e Veghje, Fin chì,
Lisbona, u zitellucciu…
Richard Girolami hè statu purtatu in terra ssu 15 di maghju in u so paese di Castellu di Rustinu.
Arritti manda affettuose pensate à i soi.
A Corsica di u cantu perde una voce è un omu di talente sèmplice è spùticu.
Ch’ellu riposi in pace.