E parulle màncanu di pettu à l’orrore di i crìmini islamisti. A « guerra » chì s’hè ingagiata hè quella di a libertà di pettu à u sacratu. Artìculi di stampa, disegni, imparere, sò visti cum’agressioni insuppurtèvule è pòrtanu mane assassine, ghjòvani incerbellati è fanatizate, o mostri chì i manipulèghjanu, à cummette atti tremendi pigliendu a vita, sparghjendu u terrore, imprigiunènduci nu a paura di fà, di dì, di pensà.
L’accolte in Aiacciu, Bastia, Corti, Calvi, Portivechju cum’è un pocu dapertuttu in Francia sò manere di vultassi è di sustene a famiglia di Samuel Paty mortu per avè vulsutu imparà ssa libertà di pensà à i zitelli, ma dinù per sustene tutti l’insignanti di Francia oghje di pettu à ssa scimizia è incuragìsceli di cuntinuà à insignà malgratu ssu cuntestu di terrore. Vince a guerra, risponde à ssu terrore, suppone una risposta cullettiva, sulidaria, cutidiana, ferma di pettu à quelli chì tramàndanu l’odiu è u fascìsimu. È a difficultà hè di pudè risponde cusì senza fà vìttime nucente, senza nutrisce u razzìsimu è senza sbagliassi di sìbula imbuglighjendu ghjente ch’ùn ci èntrenu per nunda.
Ùn simu micca armati per risponde.
A pulizza, a ghjustizia, l’amministrazioni, e forze di prutezzione di a sucetà ùn sò micca abbastanza furmate è dimensiunate per risponde à quella scumessa. Dumènica in Corsica è in tutta a Francia, èranu accolte di dulore, di sustegnu è d’umagiu, ma dinù accolte di còllera, per raportu à a sulitùdine di ss’omu minacciatu è ch’ùn hà micca truvatu u sustegnu ch’ellu aspettava da e forze di su Statu è da a so ierarchìa chì era pront’à sanziunalu ! Cum’è i ghjurnalisti di Charlie Hebdo ùn anu truvatu e prutezzioni pulìtiche ch’elli abbisugnàvanu per fà campà ssa libertà di pensà, di dì, di macagnà, di rìdesi di tuttu, ancu di u sacratu. Ci vole à dilla, ùn l’anu ancu trovu avà !
Senza ssa sulidarità indispensèvule, ssu sustegnu chì và bell’aldilà d’accolte di prutestazione, u mondu insignante ùn puderà più travaglià è u terrore ùn ferà chè cresce. A sucetà hè oghje ind’è ssu parapiglia è tene, ssu capatoghju diffìciule di duvè risponde à un malannu natu per strùghjela. Ci tocca à ristringhje à libertà d’agisce di sse pensate è di sse mane assassine senza ristringhje e libertà chì fàcenu a forza di e nostre sucetà. Ci tocca à esse d’una sulidezza murale spietosa è d’una ghjustezza di più tremenda chì quella d’oghje da ch’ella ùn nasci a guerra ch’elli vòlenu. Da ùn affundacci micca di più ind’è u spaventu.
Ci vole à prigàssila bona. •
Lire aussi Le professeur décapité
F.G.
