Zia Saveria Ceccaldi si ne hè andata. S’hè spenta in u so lettu, in la so casa, in lu so paese, Marignana. À centu è dui anni passati…
Dopu avè allivatu figlioli è figliole, avìa vistu nasce parechji puffiglioli è arcipuffiglioli, masci è fèmine. Hè tuttu un famiglione chì l’hè sempre statu à fiancu.
Zìa Saveria avìa participatu à parechje attività in raportu cù a nostra cultura, offrendu vulinteri a cunniscenza ch’ella avìa dill’usi d’una volta. Fù ancu una infurmatrice pari u studiu di u Parcu Rigiunale sopra à e piante salvàtiche, è participede à u libru « Àrburi, arbe è arbìgliule ».
L’accarse ancu di turnà ind’un filmu. Era cum’è di dì un’ avanguardista arradicata à l’usi antichi !
Donna di caràttare, forte quant’è ginarosa, a so primmura era chì tuttu u mondu fussi bè.
Dui anni fà, pà i so cent’anni, ci era un mondu scemu in paese par rèndeli umagiu.
Simbulizava par tutti una vita corsa è paisana, fatta d’anestità, di rispettu par tutti è d’amore pà i soi.
À Anna Marìa, à Lisabetta, à Francesca è à Pàulu, è à tutti i soi, Arritti manda e so cundulianze amicale è sincere. Pinsemu particularmente à Matteu, u so puffigliolu, chì travaglia par Arritti.
Viramente una donna di primma trinca… Avà, ch’ella riposi in pace.