Ùn si vede ch’in Corsica ! Neve, acqua, gràndine o ventera, in tutti i stàdii di Francia è di Navarra, l’ufficiali s’adunìscenu omancu duie ore nanzu à u macciu per evaluà a situazione è decide s’omu pò ghjucà o nò…
In Corsica nò. Si face entre a ghjente in un stàdiu carcu à trunchera, si face sorte i ghjucatori da ch’elli si scàldinu è si mèttinu in gamba, s’aspetta l’ùltimu mumentu per dì : « avemu da aspettà torna a pena vistu e cundizioni meteò »… da fà cutrassi è inzerghisece un pùblicu in bullore… cum’è s’omu s’aspettava qualchi disturbu, nè ?… nanzu infine di ripurtà u scontru, ciò ch’omu pudìa fà a matina stessa… È tantu peghju per quelli ch’anu fattu dui o trè ore di strada ! Di chè esse azezu, nò ? •
