Induve và u Brasiliu? Frà e più grande demucrazìe di u mondu, u paese di u ballu, a festa, u festivale, hè ottèsima putenza mundiale, conta frà e più grande fureste di a pianetta cù l’Amazonìa, mondu richezza, frà e quale e più grande riserve di petroliu…
Eppuru, più di 200 millioni d’abitanti capiciuttèghjanu ind’u bughju. A crèscita di u novu presidente di u più grande Statu di l’Amèrica Latina s’hè accumpagnata di crìmini è minaccie da tutte e mamme dapoi parechji mesi. Neri, pè u più, abitenti di e favella, omossessuali, artisti, ghjurnalisti, studienti, intellettuali di manca, militenti di i diritti di l’omu o di l’ambiente… sò i più inditati. Eppuru, affucati in a crisa ecunòmica è suciale, stumacati da e cumbrìcule è e cumprumissioni di e caste à u putere, i Brasiliani si sò lasciati andà senza riazzione à u peghju, Cù bugìe è manipulazioni, odiu è razzìsimu, Jair Borsolano s’hè fattu u so caminu. A stòria ricumencia.
Ind’altri paesi, d’altre èpiche, si riprudùcenu i stessi mecanìsimi chì pòrtanu i dittatori à u putere.
«O vi n’andate, o serà a priggiò ! » mughja Jair Borsolano à chì a vole sente. Hà minacciatu Fernando Haddad, u candidatu di u Partitu di i Travagliatori è tutti i l’uppunenti. «Avemu da sbarrazzà u Bresiliu da tutti ssi banditi rossi ». Hà prumessu à l’industriali di scioglie u ministeru di l’eculugìa abbandunandu à a destruzzione e fureste primàrie. Hà dettu ch’ellu scioglierebbe dinù u muvimentu di « i paisani senza terra » è quellu di « i travagliatori senza tettu », duie ONG impurtante ch’ellu accusa di terrurìsimu. Qualchi ghjornu nanzu à u secondu giru, a pulizza bresiliana hè entruta ind’una trentina d’università per minà è arrestà i studienti chì sustènenu a demucrazìa.
Anu cunfiscatu un manifestu di sustegnu à l’università pùblica, corsi contr’à a dittatura, banderole contr’à u fascìsimu, frà e quale una chì dicìa «menu arme, più libri » è una antra chì rendìa umagiu à Mariella Franco, eletta municipale d’un partitu di manca in Rio, omossessuale nera ch’hè stata assassinata in carrughju di marzu scorsu. Entruti in una sala di classa anu minacciatu una prufessore chì fecìa un corsu nant’à i fake news, sse false nutizie chì manipulèghjanu a ghjente nant’à e rete suciale. Un inchiesta rivela chì i servizii di cumunicazione di Borsolano anu mandatu di manera massiva nant’à whatsapp messagi per imbruttisce u Partitu di i Travagliatori. A ghjurnalista in Sao Paulo ch’hà fattu ss’inchiesta hà ricevutu 220.000 messagii d’odiu.
Secondu à a sturiana francese specialista di u Bresiliu, Maud Chirio, sin’à 10.000 false nutizie sò state mandate, fottografìe trafficate è bugìe da tutte e mamme. Bolsonaro vole dassi una nova Custituzione, senza sottumèttela à l’assemblea custituante. Vole sorte di l’ONU è prumette dinù di «mitraglià i quartieri pòveri »… « Ss’elezzione hà da liberà a viulenza suciale è pulìtica di l’appoghji di Bolsonaro » hà dettu torna Maud Chirio, « assistemu in diretta à a fascisazione di u Brasiliu ».
Fabiana Giovannini.
