U Cullettivu Corsu per l’Adduzzione senza Razzìsimu Istituziunale hè statu fundatu u 31 di marzu 2017 à l’iniziativa d’una vintina di personi, raghjunte prestu prestu da più di 200 signatarii, per dumandà a mudificazione di documenti ministeriali per l’adduzzione chì cumpurtàvanu prupòsiti razzisti. C2ari dinunziava a manera di ripruduce ind’è ssi documenti ufficiali stereotipi è cunsiderazioni storte per sfarenzià di manera razziale l’urìgine di u zitellu messu à l’adduzzione. Stu mètodu, degnu di u passatu culuniale di a Francia, imbruttava a so imàgine è ùn avìa nunda à chì vede cù ssu mumentu impurtantìssimu di l’adduzzione d’un ciucciu. Si dumandava à a ghjente di fà sapè ch’elli ùn vulìanu micca un zitellu neru o d’urìgine africana o magrebina, in tutale cuntravenzione cù e cunvenzioni internaziunale pè i diritti di u zitellu. « Chè no sìamu anziani pupille di u Statu, adduttati o parente adduttente, presidente o vicepresidenti di Cunsiglii di Famiglia dipartementali, membri di cumissioni d’appruvazione, eletti o sèmplice citatini, ci stumachemu di stu fattu. Ùn hè pussìbule di tullerà spressioni razziste chì partecipèghjanu cusì à sparghje u razzìsimu di manera furba, puzzulente è periculosa » dinunziava u cullettivu chì dumanda ch’ùn sìa « mai quistione d’indità o suppone pocu imprema a manera, una scelta nant’à u culore di pella o l’urìgine ètnica in u prucessu chì cunduce à l’adduzzione d’un zitellu ».
Sta dimarchja cuncernava tutta a Francia, ma hè nata in Corsica, fendu onore à u nostru pòpulu da a so manera umanista à difende è prutege a zitellina. « Dapoi sempre, a Corsica s’hè fatta cunnosce ind’è a stòria per fà cresce i diritti di l’Omu. Da u drittu à a libertà di cuscenza in u 1736 à u dirittu à vutà di e donne in u 1755, per un parlà chè di quessi. Durante a seconda guerra mundiale, a Corsica s’hè torna singularizata quandu ci hè vulsutu à prutege i ghjudei, à tale puntu ch’omu vulìa scrive l’Ìsula nant’à u Memuriale di i Ghjusti frà e Nazioni. Stu mumentu scrittu ind’è a nostra stòria ci impone d’èssene degni. Oghje ghjornu hè u nostru duvere di dinunzià è di bàtteci contr’à tuttu ciò chì partecipeghja à u razzìsimu », spieca a chjama di u C2ari.
Ghjè l’associu Zitellu Famiglia Adduzzione in Corsica (Enfance Famille Adoption 2B), presidatu da Agnès Rogliano Desideri, ch’hà fattu sapè stu scàndalu di documenti amministrativi razzisti in i servizii d’adduzzione in Francia. Cù ella, anu ziffratu mondu duttori, universitarii, insignanti, ghjuristi, eletti è citatini di tutte e tendenze pulìtiche.
L’azzione di C2ari hà permessu di currege ufficialmente sti documenti, cù l’aiutu di l’avucata di u Cullettivu, Ma Celine Boyard. Ma bisognu à esse attenti chì si tròvanu sempre andature razziste in e prucedure lucale di l’Aiutu Suciale à a Zitellina (ASE). C2ari cuntinueghja à scumbatte contr’à u razzìsimu è e discriminazioni ind’è e dimarchje amministrative, da prutege i zitelli è i parenti suvente maltratati in i so dritti sprezzati da l’istituzioni. •
Cuntattu nant’à X (Twitter) : @C2ARI
