S’omu vole capisce cum’ellu hè resu pussìbule un feminicidiu, li basta à seguità u prucessu di Mounir Boutaa, st’operai di 48 anni oghje, ch’hà tombu a so moglie da a quale era spiccatu, u 4 di maghju 2021 in Merignac in Gironde. Arritti avìa parlatu à l’èpica di stu crìmine spaventosu. Mounir minava Chahinez dapoi anni. A corcia donna di 31 anni, mamma di trè figlioli, tichjata di colpi à parechje volte, viulentata in cinta, cuntrullata notte è ghjornu, chjosa in casa, minacciata, trova puru u curagiu di chjamà l’aiutu di a pulizza. Hà postu sette lagnanze trà 2018 à 2021. Hà pruvatu à staccassi di sta rilazione periculosa. Ma e stituzioni ùn sò ghjunte à parà u crìmine. Puru, Mounir era statu cundannatu di ghjugnu 2020 à 18 mesi di prigiò per viulenze vuluntàrie, cù 9 mesi attempati è 2 anni prubatòrii. Ma trè mesi dopu era lìberu. Ancu cù l’interdizzione d’avvicinà a so vìttima, prova sùbitu à entre in cuntattu 36 volte minaccièndula. U 15 di marzu 2021 scontra à Chahinez è l’assalta torna pruvendu à strangulala. Chahinez si rende torna in cumissariatu. Ma a lagnanza hè presa da un pulizzeru cundannatu per viulenze cuniucale anch’ellu… è Mounir ùn hè micca interpellatu ! Dui mesi dopu, accade quellu ghjornu maladettu, à mezu à u carrughju di fronte à a so casa, Mounir l’aspetta, imbuscatu ind’un furgò, li tira duie fucilate in e gambe da ch’ella ùn possi scappà. L’annacqua d’essenza è a brusgia viva. Brusgia dopu a so casa allora chì u so figliolu di 12 anni scappa pedi scalsi…
U martoriu di Chahinez ùn hà duratu solu sti mumenti d’orrida suffrenza brusgiendu viva. Hà duratu durante settimane, mesi è annate induv’ella era tichjata di colpi. Hà duratu durante ste stonde in cumissariatu per pienghje un aiutu. Nè pulizza, nè ghjustizia, nè stituzione, nimu ùn s’hè mossu cum’ellu ci vulìa per ella. Hè firmata sola Chahinez. Abbandunata à a so sulitùtine di pettu à u so boiu. L’affare dice quantu i disfunziunamenti di a sucetà cundùcenu à a morte. Cum’è e trè scìmie, nimu ùn sente, nimu ùn parla, nimu ùn vede. Malgratu l’assassìnii, malgratu tutte e testimugnanze, malgratu tuttu ciò ch’omu palesa ogni annu nant’à e viulenze fatte à e donne, i pulizzeri, i magistrati, tutti quelli chì si sò truvati di pettu à a situazione di Chahinez (o di Mounir stessu, perchè ùn era à a so prima vìttima), sò stati incapaci di porghje sustegnu. A pulizza ch’ùn dà a prutezzione ch’ella dumandava Chahinez. A ghjustizia ch’ùn face micca appiecà e cundanne è l’interdizzioni d’avvicinà a vìttima. Di ghjennaghju 2022, trè pulizzeri sò sanziunati solu d’avertimenti è di trè ghjorni attempati di sclusione tempurarie di funzione. A precuratore di a Repùblica hà dettu « a morte di Chahinez ci hà cundutti à interrugassi cullettivamente nant’à cumu migliurà di più u sistema pulizzeru, ghjudiziariu è d’invistigazione ». Iè ma, Chahinez, ella, hè morta.
Nanzu à Chahinez, Mounir sposa à 24 anni un antra donna. Anu trè figlioli inseme. A corcia dinunzia e viulenze, minaccie, insulte, raporti sessuali furzati, calci è pugni, ch’ella hà ricevutu…. Si stàccanu infine, quand’ellu scontra à Chahinez in 2012… Vale à dì quantu Mounir era cunnisciutu cum’un omu periculosu. Eppuru, ùn hè statu survegliatu cum’ellu ci vulìa. À i figlioli di a so vìttima, à i so parenti, ùn li fèrmanu chè l’ochji per pienghje.
Da quì à qualchi mese, dopu à u prucessu di Mounir, un antru prucessu s’aprerà, quellu di i parenti di Chahinez contr’à u Statu è e so rispunsabilità. •
