U 2 di marzu 2022 era u tristu anniversariu di l’agressione murtale d’Yvan Colonna in a prigiò d’Arles, frà e più securizate di Francia. Infine… si dicìa cusì à l’èpica….
Stu 21 di marzu, ferà trè anni ch’ellu hè mortu Yvan dopu à trè settimane di martòriu.
Ch’hè diventatu u so assassinu, Franck Elong Abé ? Troppu viulente, era statu ciambuttatu da una prigiò à l’altra induv’ellu hà cummessu parechje agressioni torna contr’à d’altri detenuti è contr’à guardiani, sin’à esse mandatu in Arles. Ma micca abbastanza viulente per esse « evaluatu » in cumissione nant’à a radicalisazione. Invece, hà avutu u drittu, ellu, d’un evaluazione speciale. Vale à dì l’aministrazione l’hà risparmiatu dènduli certi vantaghji per appruntalu à a so surtita. Li hà datu un impiecu per esse in cuntattu cù l’altri detenuti, li hà datu u drittu di fà i passi è vene in a prigiò, d’entre è sorte in certe sale, frà e quale a famosa sala induv’ellu hè statu agressatu Yvan.
L’ùltima volta ch’avemu intesu parlà di st’omu periculosu, hè d’aprile 2024 dopu à a lèttera ch’ellu avìa scrittu qualchi ghjornu nanzu à u ghjùdice d’istruzzione in càrica di l’assassiniu d’Yvan. Spiecava ind’è sta lèttera, scritta da a prigione di a Santé, ch’ellu era statu burlatu da agenti « manipulatori » di a DGSI (servizii di rinsignamenti interiori francesi) chì l’avìanu prumessu di dalli 100.000 àuri ogni annu di prigiò s’ellu tumbava à Yvan. Ma soldi ùn ne hà micca tuccatu : « Si sò servuti di mè cum’è un abruttitu » dicìa nant’à ssa lèttera l’omu stumacatu… è stumachente, prumettendu anch’ellu : « aghju da dì tuttu ». Ma di fronte à u ghjùdice qualchi settimana dopu, s’era chjosu in u silenziu…
Ben intesa, i servizii anu smintitu st’infurmazione « senza fundimentu, i servizii di u ministeru di l’interiore ùn cumàndanu micca assassinati, nemancu agressioni… sse pràtiche ùn esìstenu micca ».
I « servizii » tandu avìanu lanciatu un inchiesta. Qualchisìa ne hà qualchi nutizia ? Umbeh…
Allora… bugiardu, manipulatore, scemu strapazzu, o manipulatu ?
Qual’hè a vera persunalità d’Elong Abè ? Induv’hè a verità di st’affaraccia ? Averemu un ghjornu e risposte ?
E sole cose chè no sapemu ghjè u so prufile « d’altu spettru di u terrurìsimu islamistu », u fattu ch’ellu era po dassi « un indic » di a pullizza (secondu à testimugnanze durante l’inchiesta di a cumissione parlementaria), è cumu s’hè passatu u crìmine è i ghjorni nanzu.
Elong Abé, l’avemu detta, hè messu in cundizione d’esse facilitatu. A pussibilità d’avvicinà Yvan, allora ch’elli èranu tremindui sott’à u famosu statutu DPS (detenutu particularmente signalatu).
A facilità per entre in a sala induve Yvan fecìa u so sport, allora chì u regulamentu di a prigiò ùn a permettìa micca. E cundizioni di l’agressione e cunniscimu, u statutu d’ausiliaru à u quale ùn avìa drittu in tantu chè DPS, e so minaccie ghjorni nanzu (« aghju da tumbalu ») micca prese in contu da i guardiani, a videò in panna, l’assenza di surveglienti, i 9 minuti tranquilli per operà, eccèttera, eccèttera…
Yvan, ellu, ùn s’hè dubitatu di nunda chì cunniscìa à Elong Abé è ch’avìa rilazioni nurmale cù ellu…
In quantu à a ragione di ssu crìmine ùn si capisce micca. A tesa di u ghjastema ùn tene micca secondu à parechji testimogni, è sopratuttu Franck Elong Abé duvìa sorte di prigiò qualchi mese dopu… perch’è mèttesi cusì ellu stessu in perìculu ? A tesa di u colpu di scimizzia ùn tene micca anch’ella chì tuttu indita ch’ellu avìa premeditatu l’assassìniu. Allora, perch’è ?
Elong Abé hà dettu chì l’agenti di a DGSI li avìanu datu un telefuninu per cumunicà cù elli… Hè statu ritruvatu ? Analizatu per pruvà di ritruvà i cuntatti ? Ùn si sà. Per avà simu sempre in u sicretu di l’istruzzione… Serà in securità ? Si tene bè dapoi trè anni ? Quandu si ferà u so prucessu ? A so integrazione in QER (locu per evaluà a so radicalisazione) ùn s’hè micca fatta per vìa ch’ellu era « troppu periculosu » hà palisatu l’aministrazione penitenziaria tandu. Ma ùn era micca abbastanza « periculosu » per esse cuttighjatu, è per ch’ella sìa appruntata a so surtita di prigiò vistu ch’ellu avìa compiu a so cundanna.
Averemu « ghjustizia è verità » ? •
