Ùn hè micca a prima volta disgraziosamente chì a màffia tocca aldilà di i so ranghi…
Un sbagliu, dice u precuratore. Chloé hè stata cacciata à l’amore di i soi per vìa d’un sbagliu. S’hè spenta nanzu di cunnosce a vita, assassinata in a vittura di u s’amicu, forse pensendu à e pìccule cose di u cutidianu, senza avè u tempu di rèndesi contu di ciò chì l’arrubava à l’avvene ch’era apertu spalancatu per ella. 18 anni, una giuvanotta, una zitella, richjappata da u più neru di e realità di a Corsica oghjinca. L’orrore hè di più insuppurtèvule ch’ellu ramenta quellu di l’assassìniu di Pilou, un antru giòvanu corsu di 33 anni, u 23 di dicembre scorsu in un caffè d’Aiacciu, à a vigilia di Natale è dopu à a bella gioia cullettiva di a venuta di u Papa Francescu. Un antru crìmine gràtisi ch’hà fattu dinù sei feriti. L’assassinu avìa un arma è hà regulatu i so conti tirendu… Ste duie morte gràtisi anu sbrembatu a Corsica sana. Sò testimogni di i nostri demonii d’una sucetà induve l’arme è a droga si spàrghjenu cum’è nunda, induve u mitu di u banditu face sempre sunnià à certi, induv’omu s’autorizeghja à difende e so vuluntà senza rispettà nè lege nè vita.
A zerga, u stumacheghju, a tristezza infinita di a maiò parte di noi altri ùn ghjòvanu à impedisce i crìmini è u spaventu di ciò ch’ella porghje a màffia in Corsica. Bisogna à dì innò à ciò ch’ella diventa oghje, una cumpunente addimesssa di a sucetà. Si brama una rivolta demucràtica di tuttu u corpu suciale. Hè per quessa chì l’iniziativa di i dui cullettivi contr’à a màffia hè impurtante è deve fassi sente. Ci vole à falà in carrughju. Ci tocca à ricusà sti malanni, u foscu di tutte l’andature chì pòrtanu à prutege pocu à pocu senza ch’omu si n’avvede e derive maffiose. Perch’è sò numarosi quelli chì s’addispèranu di l’assassìniu di Petru Luigi o di Chloé, allora ch’elli mèttenu anch’elli senza accòrgesine e petre à a custruzzione d’una sucetà maffiosa. Tutte e cundanne ùn anu u stessu pesu. Ci volerà capisce una volta per sempre chì u rispettu di a vita hè a basa di tuttu, è ùn si rimette in càusa solu cù l’arme ma dinù cù l’andature mischine, i tràffichi, e gambate, u disprezzu di e lege, u disprezzu di l’altru, l’orgogliu è a vuluntà d’impònesi quale ne fù u prezzu. Avemu u bisognu d’una rivolta interiore, iè. L’educazione, a ghjustizia, a pulizza, a pulìtica, e stituzioni cum’elle funziònanu di sicuru, ma dinù à u livellu individuale a manera di vede a vita è e rilazioni cù l’altri. A Corsica hà troppu campatu à brìglia sciolta quand’ella avìa bisognu di règule cum’è tutte e sucetà demucràtiche. Sèculi di vindete per parà i malfatti d’un paese chì campava senza ghjustizia, ma a viulenza chjama a viulenza è nàscenu d’altre inghjustìzie… Decine d’annate di viulenze pulìtiche per parà a cusì detta « viulenza madre » di u Statu, ma torna quì omu ùn si pò fà ghjustizia senza accende e bruste d’altre inghjustìzie è viulenze cecche. Ne pachemu u prezzu oghje di tutta sta stòria ch’hà indidatu cumpurtamenti è règule d’autodifesa. Innò ùn sò micca scritti in u genu corsu ste règule quì, ma unipochi ùn anu ancu capitu o addimessu ciò ch’ellu hè u rispettu di l’altru. Per paranne e cunsequenze, ci tocca à mubilizàcci à tutti i livelli di a sucetà per strughje u cuntestu induv’ella pruspera è si nutrisce a màffia. Per Pilou è per Chloè. •
