30 per vìa ch’ella hè a trentèsima cunferenza mundiale nant’à u scambiamentu di u climà. È digià face pulèmica per vìa di u locu induv’ella si passa. Belem, à u Brasiliu, à l’orlu di a furesta amazuniana in perìculu. Belem induve ùn ci hè micca abbastanza alberghi è induv’ellu ci hè vulsutu à fà vene battelloni pulluenti, specie di mostri marini, per accoglie i participanti. L’aviò dinù chì i traspòrtanu fàcenu cresce à fattura carbona… cum’è tutti l’evenimenti mundiali. Ma à u puntu induv’ellu hè u mondu, a priurità hè di pudè dibatte inseme, capu à capu, è piglià decisioni vitale per fà piantà i ciambuttamenti climàtichi. L’altra desillusione hè l’attitùdine di u presidente di i Stati Uniti, Donald Trump, puru frà i più grandi pulluori di a pianetta (11% di l’emissioni di gasi à effettu di serra) dopu à a China (30% di l’emissioni GES). Daretu, vènenu l’Ìndia (8%), l’Auropa (6%) è a Russìa (5%). Ghjunghjeranu tutti à sèntesi da pudè fà rinculà e minaccie di u riscaldimentu climàticu ? E precedente COP ùn anu datu nunda, fora di 10 anni fà, a COP 21 in Parigi, ma e so risuluzioni ùn sò state messe in ballu, nè in u mondu, nè in Francia stessa purtata ancu in ghjustizia da l’associ ch’indìtanu l’irrispunsabilità di u guvernu !
Da u 10 à u 21 di nuvembre, s’adunìscenu dunque i putenti di a pianetta, fora di Donald, per circà di cambià di versu. Ghjè chì a furesta amazuniana ghjoca un rolu capitale pè a priservazione di u clima mundiale. Sempre più studii mòstranu chì a sfurestazione hè rispunsèvule di a calata di 75% di e piosse in perioda secca. Ghjuvellu di natura, e fureste trupicale sò d’una richezza senza paru per aggruttà animali è vegetali, sputa un ossigene capitale è ingullassi u carbonu in iscambiu. À u prugramma, a ghjustizia suciale, a bioecunumìa, è a prutezzione di l’ecusistemi amazuniani. I scopi ? Nove misure per circà di stà nant’à una crèscita di 1,5 gradi, micca di più. Dice u guvernu francese, « serà un locu di verità induve omu evaluerà a credibilità di e prumesse è a capacità cullettiva à trasfurmà i mudeli ecunòmichi è energètichi »… Umbeh…
Frà e misure in discussione, un fondu d’invistiscimenti di 125 milliardi di dòllari pè a cunservazione di e fureste trupicale (u TFFF per Tropical Forest Forever Facility), è u Baku to Belem Roadmap, un ingagiamentu à aumentà u finanziamentu climàticu internaziunale per ghjunghje sin’à 1,3 trillioni di dòllari ogni annu, da quì à u 2035. 10 anni per pruvà di cambià di versu. Vistu in Francia è in Auropa i prublemi bugetarii è di a dèbita pùblica, è vistu in Amèrica e cacciate di Trump, vistu dinù e crise dapertuttu in u mondu, da à Russìa à u mèdiu oriente è à l’Àfrica nera… u travagliu pò ci hè per cunvince !
« Un prufumu d’idrocarburu hà accoltu i delegati annu scorsu in Baku » dice u media Brut. « Ghjè l’umidità amazuniana ch’elli anu da rispirà i 50.000 participanti di a COP 30 in Belem »…
« A ghjente deve vede a situazione di e fureste, i fiumi, i pòpuli chì ci càmpanu » dice u presidente brasilianu Lula. Secondu i scientìfichi, l’indiature attuale cundùcenu à una crèscita trà 2,3 à 2,5 gradi da quì à a fin’di u sèculu… Vale à dì ci hè bisognu di riduce d’omancu 35 à 55% l’emissioni di GES. Ma per avà ùn si privede chè una calata di 15%…
Eppuru, ci volerà à strappà di più ! 1,5 gradi ùn hè solu un scopu, ghjè una quistione di sopravivenza per l’Umanità. •
