U cullettivu Massimu Susini hè natu d’un drama, l’assassìniu di Massimu Susini. U 12 di sittembre 2019, u giòvanu militente naziunalista, membre di Core in Fronte, casca sott’à e palle allora ch’ellu si rendìa in u so locu di travagliu, a paillote ch’ellu avìa stallatu nant’à a rena di Carghjese. I soi, parenti è amichi, dinùnzianu sùbitu a màffia lucale. Massimu si vultava contr’à e derive maffiose in u so paese, si sapìa in perìculu ma vulìa fà fronte è ricusava d’in-ghjinuchjassi di pettu à sta malamorte.
U 6 d’ottobre, centinaie di parsoni s’adunìscenu in Carghjese per creà u cullettivu Massimu Susini chì pìglia u nome di u militente di 36 anni. L’emuzione, u disgustu è a còllera sò forte. Parte soia, l’autorità ghjudiziarie ricunnòscenu un crìmine maffiosu postu ch’elle incarichè-ghjanu di l’inchiesta a JIRS di Marseglia un mese dopu à l’assassìniu. « A so persunalità, a so èttica, e so lotte ùn làscianu nisun dùbbitu nant’à l’urìgine di u so assassinatu… hè un crìmine maffiosu » paliseghja u cullettivu. « L’elementu primu per definisce a màffia, hè quellu d’un putere occultu ch’ambiziona di cuntrullà l’inseme di a sucietà… generalizendu in u corpu suciale u modu di guvernanza ch’ella impone già à e so imprese… A màffia ben intesa sò i rubadori, i criminali, l’assassinii, ma a màffia ghjè dinù una parte di u mondu ecunòmicu, i currotti, i ladri, l’omi di pàglia, e rilazioni d’interessi fundati nant’à u sviamentu di u soldu è a scruccunerìa. A màffia ghjè a curruzzione è a vigliacchezza d’una parte di u mondu pulìticu (per ottene i marcati pùblichi, mudificà i PLU, i permessi di custruisce illegali). A màffia ùn hà micca ideulugìa. Ùn cerca chè u putere. S’addatta à tutti i partiti presenti in Corsica » dice torna u cullettivu chì dinunzia l’arnesi di u Statu, pulizza, servizii, magistrati ch’utilizèghjanu a màffia, « A màffia si nutrisce di a paura è di a servilità ».
U cullettivu s’hè datu cum’è missione di luttà contr’à st’impresa di a paura, l’assassìnii è i so cumplici nant’à u rughjonu di Carghjese. Dinù chjama à sviluppà e lee di sulidarità è d’aiutu cù d’altri territorii sott’à impresa in Corsica, è à sustene tutte l’azzioni chì dinùnzianu è vòlenu fà rinculà a màffia. Prupone di mette in ballu arnesi ghjurìdichi efficaci, per un dettu a custituzione di un delittu d’associu maffiosu, u sequestru cunservatoriu di e ricchezze di i maffiosi è a so distribuzione à cuuperative dopu à a so cundanna, a prutezzione di i ripentiti.
Cusì, u cullettivu Massimu Susini partecipeghja à i travaglii è i dibàttiti di l’Assemblea di Corsica per mette in ballu una vera pulìtica di lotta contr’à a màffia. •
Infurmazioni : https://massimususini.corsica/
