I Chjami Aghjalesi

A lingua di i mei

In core di i mei ci dorme l’allegria

Puru quandu a vita inciampa i so passi

Ci dorme tant’amore è tanta puesia

Ancu s’elli sò zitti o s’elli stanu bassi.

 

In bocca di i mei ci stanu mille fole

Da cuntammi li tempi di tutte le sumiglie,

Chì tèssenu a leia nant’à un filu d’amore,

Mentre a vita corre è strappa ogni briglia.

 

In manu di i mei hè scritta a spartera,

In lèttare sulcate da e cugliere andate,

Hè dettu lu travagliu è po la straziera,

Per fà cresce più belle e so nove biate.

 

In l’ochji di i mei ci vecu tante frante,

Tant’amori pertuti à l’eterne credenze,

Una manera d’esse, una fede tamanta,

Tuttu ciò ch’hè amore è chì pare viulenza.

 

In casa di i mei ci canta una lingua,

Vechja quant’è a terra induve elli sò nati,

È vulia d’amore scrive ‘sse duie rime,

Dilli quant’e sò fieru d’avelli à lu mio latu,

È vulia d’amore scrive ‘sse duie rime,

Dilli quant’e sò fieru d’avelli à lu mio latu.