Pras pi danrek, tou phek lo puk
Attempu surtitu da a palanca, a si scialla annant’à a strapunta
(pruverbiu cambogianu)
Salute à tutte è à tutti. Sta settimana parleremu di a strapunta. « O chì piaceri ! Appena di riposu. A cunnosci a passata di Alphonse Allais : “J’ai fondé la Société protectrice des végétaux. Nous sommes en train de poser des matelas sous les arbres pour amortir la chute des feuilles” ? » Innò, ùn l’avia mai intesa. Eccune un’antra di Mme de Sévigné : “Mes sueurs sont si extrêmes, que je perce jusqu’à mes matelas”. Allora peccatu postu chì dìcenu « Non puoi restituire un materasso usato ».
Ma cosa hè a strapunta ? Ci ampara l’Infcor chì ghjè un « Saccone imbuttitu di lana o di crinu per dormeci nantu ». Esce da u talianu strapunto chì u significatu sicondu à u Treccani hè : « Rozzo materasso, da stendere anche in terra, ripieno di lana o capecchio o bambagia o anche di paglia, ecc., e impuntito ». Esiste u diminutivu strapuntino « sedia, poltrona o sedile pieghevole o ribaltabile che, in automezzi pubblici, in teatri, ecc., viene aggiunto quando tutti i posti normali sono già occupati. Sulle navi, pagliericcio su cui dormono i marinai ».
Cù a prima accezzione, t’avemu u corsu « strapuntinu » (Piccula strapunta per un lettinu. – Sedile pieghevule chì si trova in certe vitture è in e sale di spettaculu). Sta forma hè, d’altronde, à l’orìgine di u francese « strapontin ».
« Strapunto » hè u participiu passatu di « strapungere » chì hè un derivatu di u latinu « transpungere » « trapassà, perfurà ». Sicondu à u Littré, « Le strapunto est une mince étoffe matelassée : le rembourage est maintenu en place par une série de points à l’aiguille qui transpercent le tissu de part en part. Le strapontino est un petit siège d’appoint garni de cette étoffe ».
A strapunta hè attestata in parechje òpere litterarie. Ind’a Principessa sopr’à u pisellu, fola di i fratelli Andersen di 1835, si palesa principessa una ghjòvana senza figura chì ùn hà pussutu dorme per via d’un pisellu piazzatu da a mamma di u prìncipe sottu à una serie di 20 strapunte, 20 guanciali è 20 cuscini. Ind’u libru di Tim Krohn Aus dem Leben einer Matratze bester Machart (vita d’una strapunta di prima fattura) esciutu di 2014, si pò leghje a storia d’una strapunta. In questa ci anu durmitu Immanuel Wassermann è Gioia, è a si vòlenu tene perchè a sposa hà lasciatu un machjatu maiò di sangue chì s’assumiglieghja à a Mèrica. Tandu, a strapunta ci cuntarà a so avventura attraversu à l’Auropa è mentre parechje èpiche, vera protagonista di stu libru chì ci conta cù irunia è legerezza i turmenti di u XXu sèculu. •