Una settimana une parolla, (O duie, o micca, sfidàtevi di e « parolle parolle parolle…»)
Aus einer Mücke einen Elefanten machen.
Piglià una zinzala pè un elefante.
Pruverbiu tedescu.
Salute à tutte è à tutti. Sta settimana vi aghju da parlà d’un animale assai detestèvule : « a zinzala » ancu detta « zanzala », « zinzara », « zarapiccu ». « Saetta ! ùn le possu soffre. Sì scemu ? Ci sùchjanu u sangue, ci sùchjanu ! È dopu i zurnìculi ! O basta ! Staraghju zittu, ùn ne vogliu parlà ».
Allora, a zinzala vene da u latinu tardivu zinzala.
Iè, avete bè lettu. Nasce da un’unumatupea, u « bzzz » chì ci impedisce di dorme. A parolla « zanzala » t’hà astri sensi : pò designà un omossessuale, un pìcculu sbarazzinu o una persona pocu raccumandèvule.
L’insettu esiste dapoi u Ghjuràssicu, 170 millioni d’anni fà. U più vechju fussile ricolla à l’èpica di u Cretàcicu : si tratta d’una zinzala trè volte più grande chè quella chè nò cunniscimu !
Si trova da per tuttu, fora di l’Antàrtica è di l’Islanda. Si sà chì ghjè a fèmina chì suchje u sangue, è ch’ella trova e so vìttime cù l’uduratu (li piace sopratuttu u muscu di quellu chì t’hà manghjatu u casgiu !).
T’anu sempre purtatu e malatie è i diversi gruppi umani anu circatu à sbarazzàssine.
L’Egizziani avìanu inventatu e zinzalere. In l’antichità, Ippòcrate, Omeru, Aristòtele anu mintuvatu a frebba di l’acque ùmide, è oghje chì hè oghje, e ricerche nant’à l’ADN di Rumani morti trà u Iu à u IVu sèculu anu palisatu a presenza di a malaria. Di fatti, e case èranu custruite vicinu à e fonte è, d’altronde, l’urbanisazione favuria a stallazione di e zinzale per via di i pozzi, di e latrine, di i fussetti è, sopratuttu, di a presenza in u stessu locu d’omi numarosi. Per parassi, in Roma, si hè custruitu a Cloaca Maxima, da assiccà l’acque padulose.
E zinzare sò a terza piaga d’Egittu è svèlanu una antru prublema : a sparizione di i predaghji : a ranochja, i pipistrelli, e rundinelle, certi pesci, catelli lurchi, ecc. Ma à qualcosa sò bone : e zinzale sò impurtantìssime per l’impullinazione.
È per compie, sàppiate chì l’insettu hè ricercatu è allevatu da l’acquariòfili per nutrisce i so pesci.
Avà hè l’ora di a canzona : www.youtube.com/watch?v=uy6pISoPCrQ
Marina Chovin.