Hè sempre un evenimentu quandu Antone Ciosi annunzia un cuncertu ! Di sicuru, e piazze anu da parte sùbitu… Serà à u teatru di Bastia u 25 di nuvembre pròssimu ! Hè più chè un appuntamentu cù a so voce, calda è prufonda, è u piacè di rivede quellu artistu tamantu nant’à a scena di u teatru di Bastia. Hè dinù un appuntamentu ch’ellu piglia cù a cità di a so giuventù : In Bastia hè l’intìtulu di u so novu dischettu !
Dapoi u 1963 induv’ellu hà vintu u primu festivale di u cantu corsu à l’Olympia, cù Paese Spentu, Antone Ciosi ùn hà mai chitatu a scena. Ancu puru quand’ellu hà passatu, dui anni fà, a manu à i più giòvani, cù u so dischettu « Duetti », ellu, u pilastru di u cantu corsu !
Leghje quì l’articulu annant’à u dischettu « Duetti »
Oghje Antone Ciosi ci rigala un antru dischettu. U 42u di a so bellìssima vita di cantarinu. Un travagliu chì li tenìa à core dapoi un pezzu, un umagiu à Bastia, ssa cità induv’ellu hà passatu a so giuventù è, cù ellu, à l’autori ch’ellu hà scupertu tandu : « l’Annarella, i Marfisi è tutti quanti ! Anu datu à a Corsica tante belle canzone » dice ssa bellìssima voce di Corsica ! È ssu dischettu veradimente, ci colma d’emuzione è d’allegrìa.
U pueta, tragulinu di u cantu corsu, canta, ma dinù conta, cum’ellu a sà fà cusì bè ! È ci conta Bastia, cumu l’avemu cunnisciuta, cum’ella hè sempre stata, in a so Citatella, u so mercatu, i so lochi, da e palme di a piazza San Niculà à Lupinu è Sant’Antò, da Terra Vechja à Terra Nova… cù u so campanile di San Ghjuvà, a so falata di Ficaghjola, quand’ellu spunta u sole, quand’ellu si chjina. In l’odori di i so carrughji, cù a so ghjente è e so fiure pupulare, e so cantine, u so portu, i so pescatori, i mughji di e so pisciaie, e spressioni bastiaccie, e riturnelle, i cusì belli ricordi di i tempi beati è di tante è tante risate è spartere !
Antone Ciosi hà a nustalgìa di ssi belli tempi scorsi, di e fole, di a stòria di Pesciu Anguilla. È si ghjoca di u matrimoniu di Biasginu o di i stalvatoghji di Manuè. Antone Ciosi ci dice u so Bastia, è canta, è conta, è ricòllanu à tempu in mente i nostri i ricordi à noi, u nostru u Bastia, a nostra pròpia nustalgìa… Tant’emuzione è bellezze d’oghje è di tandu ! Hè bè ancu pè i giòvani chì puderanu scopre anch’elli ssi mumenti beati è stuzzicaghjoli di l’autori di Petru Matteu Luciana (Vattalapesca) o Bastianu Dalzeto, è tant’altri, da Dumènicu o Filippu Marfisi, Marie Jean Vinciguerra, Ghjàcumu Fusina… Si ricunnòscenu in ssu dischettu e voce di Hubert Tempête, Henri Olmeta, Marie Ange Geronimi, Valerie Franceschetti… partecipèghjanu dinù e so figliuline, Luisa è Rosalie.
Antone Ciosi ringrazieghja torna « tutti ssi generosi musicanti è cantarini », Pierre Blanchard, Stéphane Chandelier, David Chiron, l’amicu Ghjacintu Maestracci, François Lassere, Jean Louis Simonpieri, Gregory Polpone « pè e so voce nustrale ! » et Fred Perrez « l’indianu ». « Un grande ringraziu à Thomas Dutronc pè a so partecipazione è a so bella ghitara » dice Antone Ciosi. È, ben intesa, u so figliolu talentuosu, Jérôme Ciosi. Dinù Patrick Wallet è François Nicolas pè e fottò di u dischettu, Mario Levesque pè a realisazione gràfficca, Alban Sturaro « magizianu di u sonu è di una grande tecnulugìa », Nicolas Rosemond per l’assistenza à u sonu dinù, u Studio Coppelia è a pruduzzione : Jean Philippe Olivi di Olivi Music.
Eccu, passerete veramente un bellu mumentu cù ssu dischettu chì ci parla in fin’di contu d’una stòria d’amore. È u puderete scopre in so fòrmula spetàculu, sè vo venite u 25 di nuvembre à u teatru di Bastia ! Simu in fretta d’esse à ss’appuntamentu !
À ringraziavvi o Sgiò Antone Ciosi per cusì belli rigali chè vo ci fate ! •
Fabiana Giovannini.
Bastia ricordi
Bastia la vita apre i tendoni à u mare turchinu
Bastia la gioia balla trinniconi à son’di viulinu
Bastia ricordi di li tempi andati
In core zitellinu
Chì tempu veranu quellu di u core
L’anni si ne vanu ma ferma l’amore.