A Còrsica t’hà i so banditi d’onore cum’è a Francia u so estru dunnaghju o i Stati Uniti i so assassinii seriali. U libru ch’o vi prisentu oghje, hè statu stampatu a prima volta di 1932, à un’èpica chì i banditi, d’onore o micca, sò per sparisce. U primu capìtulu tratta di a nàscita di a vindetta è di i mezzi messi in ballu da paralla, u sicondu di a psiculugia di a vindetta è di u banditu corsu. Isse pàgine ci danu da vede cumu a sucetà di l’annati 30 spiecava un fenòmenu ch’ùn tocca micca soladimente a Còrsica.
Marcaggi mintuva chì a vindetta ricolla sia à i Lìbichi (d’appress’à l’anàlise di i cranii, i Corsi sarèbbenu berberi), sia à pupulazione bàrbare. L’emu scappata brutta, ùn vene micca da a Francia chì, tutt’ognunu a sà, sparghje a civilisazione aldilà di u Mediterraniu ! À a fine di u XIXu sèculu, u benestà è l’istruzzione anu fattu calà u nùmeru di banditi corsi. Ma ne fèrmanu frà i pastori nòmadi chì stanu in lochi scansati o frà a ghjente chì campa in zone paludose. I banditi sò dunque sempliciotti è t’anu una « férocité native ». Sta prisentazione hè appena cuntradittoria : Nicolai era struitu è Spada pratendia di fà u duganeru.
In sti dui capìtuli, ùn si parla micca di ciò chì, puru, ci pare d’esse a càusa principale di a viulenza : l’alculìsimu. Di fatti, Crebasali, Bocognano (è, di manera più generale, tutti l’abitanti di Cùttoli), Castelli, Romanetti, Perfettini (chì t’hà in più a sifìlide), Caviglioli è Spada : anu tutti un prublema cù l’alcolu. Ci vole à capisce ch’è no simu à l’èpica di a pruibizione mericana, cù a difesa di vende ste bivende chì guàstanu u travagliatore.
Marcaggi face dopu a sfarenza trà i banditi d’onore è i parcittori. I primi, tale Nicolai o Micaelli, anu fattu a vindetta è si piàttanu.
Senza successu postu chì Nicolai sarà tombu da i giandarmi, è Micaelli, ancu s’ellu hà resu serviziu à a pupulazione è à i giandarmi, di 1932 deve sempre stà ind’a machja. I sicondi sò numarosi di più : cèrcanu à impaurisce a ghjente da ottene ricchezze. I parcittori sò viulenti di natura è, ind’u soprapiù, sò psicopàtichi : Bocognano ùn si cuntenta micca di tumbà à Corticchiato è Cruciani : i muzza è i brusgia ! Castellu hè cugnumatu «machine à tuer », Perfettini è Bàrtoli si ne pìglianu à vichjetti, infine Spada scimisce. Si fàcenu dittatori arruganti : invìtanu à giurnalisti, à pulitichanti, à magistrati… U preffettu dumandarà à scuntrà u banditu Romanetti, veru dittatore di u rughjone. In quant’à Spada, hè visitatu da donne in cerca d’emuzione, da giurnalisti…
Eccu dunque un libru bè ducumentatu, ma sopratuttu anticognu : oghje chì hè oghje, ùn si crede più chì a natura possi spiecà sola u caràtteru di a ghjente.
Marina Chovin.