Ramentemu ssu cantu patriottu di Canta u Populu Corsu. U rigalemu à i prigiuneri, e so famiglie, è à a nostra ghjuventù, e nove generazioni dopu à quelle di nanzu, sempre in lotta.
O fratelli patriotti
Di spìritu naziunale
Chi vulete esse sciolti
Da e putenze culuniale.
Oghje le prigione francese
Crèscenu le vostr’offese.
Si stringhje lu nostru core
Di sapevvi incarcerati.
Spartimu listess’amore
È ci sentimu inghjuliati
Site lu sangue è la forza
Di a nostra terra corsa.
Vi sarà longa la strada
Duri saranu i passi
E da lu pianu a la sarra
Indu l’andati è i chjassi.
Truverete e vistighe
Di tante battaglie antiche.
A Francia vi dà l’agrottu
In fondu à le so furturezze.
Ma u soffiu patriottu
In ogni pieve si tesse
È risorge la passione
Di la Corsica Nazione. •