Puesia

Donna

Donna hè un cantu in umagiu à a donna, cumposta è cantata da u gruppu L’Albinu in l’annate 80. U dedichemu à tutte e donne chì lòttanu per esse arritte è in vita.

 

Un pezzu di stracciu in manu
Un zitellu chi pienghje
E tù parti luntanu
Ma micca nant’à e piaghje
Un pezzu di bastone
Per ùnica cumpagnu
Senti lagnà babone
Chì parte pianu pianu.

Un ricordu feritu
Di a prima ghjuventù
Un amore smaritu
Che tù hai inventatu tù
Tù porti sempre in pettu
E lacrime d’amore
Ma ti alzi di lettu
E sò dighjà sei ore.

Sì donna pè u primu piace
Sì donna per esse à canta mè
Sì donna ma dìtemi perchè
Ùn c’è avvene per tè

Sì donna pè u mo primu passu
Sì donna pè u mo primu basgiu
Sì donna pè u mo primu straziu
Ma tù capisci perchè

U sudore di u fronte
Hà bagnatu e mane
E speranze sò stonde
Ma chi sarà dumane
Sò belli i to figlioli
Mà tu ùn nè poi più
Duve vanu i batelli
Ch’ùn ritòrnanu più.

Ti trèmanu e labre
D’avè troppu aspettatu
Troppu lumere care
E sole addurmintatu
E ti piènghjenu l’ochji
Senza più fà manere
Sò stanchi i to ghjinocchji
Di tutte e to prighere.

Sì donna pè u primu piacè…

Chì seranu per allora u Rè Bis
Ma chi sarà l’omu senza tè
In la notte di l’altru piacè
Tù sarai accantu à mè. •