Sta nova rubrica hè cunsacrata à i grandi pueti di a nostra lingua è di a nostra cultura. Amichi lettori, mandàteci i scritti chè v’avete da permètteci d’unurà unu di ssi munumenti di a nostra cultura. Oghje, lampemu un ochjata à Ghjanettu Notini, dettu u Sampetracciu.
Machja corsa
Machja corsa, impampanita
Cù lu to verde mantellu
Pichjulatu à mille fiori
Carchi di mille sentori,
Chì danu ghjubiliu è vita
À la bestiola, à l’acellu…
Machja corsa, tanti muschi
Tanti fiori
È culori
Dimmi : Duve l’hai buschi ?
I buscu in senu à sta terra
Impastata di lu sangue
Sguttatu in più d’una guerra
È vindetta. Oghje mi langue
Di misurà l’abandonu
Chì nun merita perdonu.
A ! sò bella, di sicuru
Cu sti fiori
È st’odori…
Pueta, càntami puru !
Si, ogn’annu rifiuriscu
Per mandà muschi luntanu ;
Si cusì ringiuvaniscu
Mostru, à lu passante stranu
In sta terra chì dà suchju
Ad àlbitru, scopa è muchju
Ch’ell’hè terra solu avvezza
Incu fiori
È culori
A miseria ed a bellezza. •
Ghjanettu Notini, San’Petru u 13 d’ottobre 1958
I ricchi d’oghje
V’arricurdate a zia Maddalena
A pecuraghja chì stava quassù ?
Sempre grattèndusi, è cùn gran’pena
Truvava à vende à rombu di sù ! sù !
Avà cumpremu a so salamoghja
È lu so latte cun benedizziò,
È per lu prezzu… cum’ella si scoghja !
Mai ùn si spiezza senza lu so « autò » !
(Riturnellu)
O ch’ella duri, la duri, la duri !
Pane biancu è fichi maturi !
Chì s’ella dura qualch’annu di più
Ziu pecurone si chjamerà sgiò !
Ancu Zia Rosa, chjamata Scunghjura
Cun centu pezze à lu so caraccò
Girandulava per la facitura
Ch’ella un pagava ch’à pezzi
è à buccò
Avà ne lutta incù la cuntessa
Straccia francese, ampara u pianò
È a dumènica ùn entre à a messa
Chè nu u silenziu di l’elevaziò.
È chì ne dite di Ghjisepp’Andrìa ?
Gran’circataghju, ognunu la sà bè !
Dopu scalatu da la culunnìa
Riceve ghjente à cinqu’ore di sera
Hà compru casa incù fornu vicinu
Chjosu, pagliaghju, giardinu dinò
Face cumbotta incù Ghjuvan’Carlinu
Per esse mere à le prime elezziò. n
Ghjannettu Notini
U Sampetracciu
—
Natu u 4 di dicembre di u 1890 in San Petru di Vènacu, Ghjanettu Notini era scrivanu è pueta, dettu U Sampetracciu. Hà publicatu frà altru, rime, puesìe varie, strufulette, punte di Minutu Grossu in a Muvra (1927), I Successi di Natalone Zuccone, cumedia in a Muvra (1927),
A Pulitica, cumedia (A Muvra 1928), Archanghjula, cumedia (A Muvra 1930),
U bascigliè di Fifina, cumedia (A Muvra, 1932), Una vechja cù Barbarismi (A Muvra 1934), Dichjarazioni d’Amore (A Muvra 1934), Scartafacci muntagnoli (U Muntese, 1968). Hà cusì fundatu u Teatru di a Muvra in u 1915 è cullaburatu cù parechje riviste di l’èpica, à
A Tramuntana, A Muvra, l’Alamanaccu di a Muvra, Baretta Misgia… è hà scrittu torna parechji canti è puesìe magnìfiche cum’è ssu cantu stuzzicaghjolu è ssa discursata cù a machja corsa.
S’hè mortu à l’età di 93 anni, in Corti, in u 1983. N