Bon Dì, bon Annu ! Pace è Salute per tuttu l’annu !
ARRITTI, cari amichi lettori, entre in a so cinquansettèsima annata ! Creatu da Màssimu Simeoni, u primu nùmaru escìa l’8 di dicembre di u 1966, per accumpagnà tutte e lotte di u nostru pòpulu è di i pòpuli marturiati in u mondu ! À l’orlu di st’annu novu, è per principialu cù a filetta, aprimu quì una nova rubrichella… dedicata à puetoni di a nostra lingua è di a nostra cultura. Cusì vi prechemu, cari amichi lettori, Pace è Salute per voi è tutti i vostri cari ! Chì 2023 ci porghji sta pace, u sviluppu è u benestà chè no bramemu tutti !
È ùn vi scurdate, infurmassi hè impurtantìssimu da pudè custruìscesi un avvene inseme ! Lighjite ARRITTI è fàtelu leghje in giru à voi, parenti è amichi ! Abbunàtevvi è fate ch’ella s’abboni a ghjente ! Bon’annata à tutti !
Ghjinnaghiu, di li mesi, marchia in testa,
Cù lu so mantillone e capi biancu ;
Da tantu li malanni, un guarda mancu
S’ell’è d’acqua o di ventu la timpesta.
Sumena, d’unde passa, tramuntane
E imbianca le muntagne d’ogni logu,
In ogni ziglia, face incippà focu
E cresce i fiumicelli e le funtane.
Pela l’ultima foglia a la virdura
E face ch’ogni cosa s’adrumenti
E canta, cu li toni, li lamenti
A u ragnu, a la sument’e la pascura.
Pardunatu ellu sìa pa lu dannu
Ch’ellu suvente face a l’agnillucci.
O quantu gioia porta a i zitillucci
Cu quella pistuella in capu d’annu ! •
Maistrale.
* Scrittura anziana di u grande pueta Maistrale ch’Arritti hà decisu di mantene tale è quale ben intesa, ancu sè oghje certe parulle si scrìvenu altrimente.
Natu in u 1872 in Marignana, Dumènicu Antone Versini era ghjurnalista è scrivanu, assai cunnisciutu, è stitutore di u so mistieru. Hè statu un difensore innamuratu di a lingua corsa tutta a so vita. U chjamàvanu « Le barde corse ».
Hà adupratu ellu stessu u cugnome di Maistrale, dopu à a morte di u pueta Frédéric Mistrale (cusì dìcenu). Hà fundatu u ghjurnale A Corsica sanu sanu in lingua corsa da ch’ellu sìa distribuitu gràtisi nant’à u fronte à i suldati corsi durante a prima guerra mundiale.
In u 1921 hà fundatu l’Academìa Corsa cù u ghjurnale A Muvra. Hè ghjuntu sociu di u Partitu Corsu d’Azzione fundatu da Petru Rocca chì rivendicava l’autunumìa di a Corsica. In u 1928 hà chitatu u partitu accusatu d’avvicinassi di i fascisti taliani.
Maistrale era un grande pueta, hà publicatu frà altru L’Almanaccu di Maistrale, hà scrittu parechji sirinati, cum’è Sirinati à i Sposi, lamenti cum’è
U lamentu di u banditu, o chjami è risponde… Hè cunnisciutu pè A Canzona di u Cuccu.
S’hè spentu l’11 di dicembre 1950 in Aiacciu. •