L’affari sò in francese : chjamà l’Agriate « le désert des Agriates », hè più ch’è un ossimoru (d’appressu à u Treccani, si tratta d’una Figura retorica consistente nell’accostare nella medesima locuzione parole che esprimono concetti contrarî.)
Di fatti, u nome di l’Agriate vene da u latinu ager, chì vole dì « champ, fonds de terre » è i vistighi d’una attività agropasturale sò numarosi in stu locu di 15.000 èttari, chì si stende da San Fiurenzu à l’Ostriconi, è chì conta 4 cumune : San Fiurenzu, Palasca, San Gavinu è Santu Petru di Tenda.
Ma l’Agriate ùn sò mancu un desertu da u puntu di vista climàticu o umanu. Di fatti, u climu hè seccu, ma ci sò fureste di lecce, fiumi (Liscu, Ostriconi), padule, lagune, marine maiò (Saleccia, Ostriconi etc.), cù una grande varietà di fiori è d’animali. In quant’à a pupulazione di l’Agriate, l’omu hè attestatu dapoi 6.500 anni, sopratuttu ver’di u Monte Revincu (anu trovu l’archeologhi stazzone, stàntari, lochi di sepultura è d’abitazione, ecc.). Ci hè dinù a bella torre genovese di a Murtella chì tene e ferite fate da l’Inglesi di 1794. È, sin’à a guerra di u 14, u rughjonu passava per riccu, per via di l’agricultura è di a pasturizia.
Innò, sò i Francesi di a siconda medità di u 20èsimu sèculu chì ci anu vistu un desertu. Ma ci anu vistu dinù un locu ideale pè u turìsimu, è ghjè què u prublema, certi anu circatu à privatizà u liturale. Anch’assai chì u Conservatoriu di u liturale hà cumpratu e lenze in bor’di mare dapoi u 1979.
È ghjè da mintuvà chì, dapoi u 2016, esiste un « Parc Naturel marin du Cap Corse et de l’Agriate » di 6.830 km2, chì u scopu hè, frà astri, di « garantir la cohérence écosystémique des paysages sous-marins […] et les activités socioéconomiques (pêche, activités de loisir, tourisme) qui en dépendent. »
È u travagliu ci hè, sopratuttu in quant’à u turìsimu. Ci vole à sapè chì dapoi qualchì annu, sò pruposti à i turisti di ghjunghje in Saleccia, sia in battellu da San Fiurenzu, sia in 4×4. St’ùltimi ponu fà sin’à sei viaghji u ghjornu ! si tratta d’una vera furtuna. Ma chì dirittu t’averanu i pruprietarii di i 4×4 di fà un cummerciu tamantu ? È quandu soffia u ventu, fàcenu u musu perchè pèrdenu assai. Ma chì paragone trà i soldi è i morti brusgiati da u focu ?
Ind’u soprapiù, hè prevista di creà una strada chì falerebbe sin’à Saleccia. Ohimella, quantu saranu i turisti nant’à a piaghja di Saleccia ? Si puderà sempre parlà di salvezza di l’ambiente ?
Ci vole dunque à riflette per truvà un modusvivendi : fà pagà a nostra natura (in Còrsica sana), impedisce d’andà sin’à a marina s’ellu ci hè dighjà u mondu, ecc.
Marina Chovin.