Sò certe famiglie chì si ponu rivindicà u tìtulu di « famiglia maladetta ». Ùn ne amintaraghju chè duie, una litteraria, una più vicinu à noi. U primu esempiu hè l’Atride : questa a sterpa ùn cunnosce chè u sangue è e làcrime. I parsunaghji i più famosi sò Agamennone è Menelau. U primu si maritarà cù Clitennestra è t’avaranu quattru zitelli : Ifigenia, Elettra, Crisotemi è Oreste. U sicondu si maritarà cù Elena chì scapparà cù Pàride, fendu schjattà a guerra di Troia. U sicondu esempiu hè a famiglia Kennedy in Amèrica : JFK sarà assassinatu, u so fratellu Robert cunnoscerà a listessa sorte. D’altronde, trè di i cinque zitelli di JFK si n’anu da more ghjòvani.
U tìtulu di u libru di sta settimana face eccu à un libru pulizzeru : Le sang des Atrides da Pierre Magnan. Di fatti, si trattarà di a famiglia Leca è di i so malanni, ind’u mentre di trè generazioni. Cun elle scupremu a Còrsica è u cuntinente da 1859 cù Alesiu Leca, natu di 1840 in Èvisa, à 1952 cù Ghjacenta. U scrittore ci face scopre un èpica impurtantìssima pè a stòria di l’Auropa. Principia cù a guerra persa contr’à u Mèssicu è si finisce cù a guerra d’Indochina. Alesiu, omu di guerra, t’avarà 8 zitelli : sei masci, chì truvaranu tutti a morte sùbitu chè nati, durante a grande guerra o in priggiò.
A narrazione hè uriginale assai : à ogni capìtulu u so narratore. Or’dunque, u libru si cumpone di duie parte : U Ritornu è De mele è di pàvaru, cù a narrazione di l’autore per principà ogni parte. Dopu, parlaranu Ghjacenta di 1906, po Alesiu di 1871, dopu ritruvemu à Ghjacenta sempre ind’u 1906, à Alesiu di 1874 ecc. Issa manera di fà permette à u lettore d’avè u puntu di vistu glubale in quant’à a situazione di a famiglia, è di sapenne di più chè i parsunaghji stessi.
Un’antra manera stilìstica per purtà cun ellu u lettore, dènduli a voglia di cuntinuà a lettura, hè d’aduprà a prolessi, cioè l’anticipazione d’una parte di a proposizione o di u periodu chì ind’a custruzione nurmale anderebbe dopu, per mette in evidenza un cuncettu o una parolla. Pudemu amintà quì Marie Dominique chì, in 1913 dice :
« J’attendrai encore cinq ans pour qu’arrive ma petite Louise et encore trois ans pour Ernest » o « d’autres + larmes + viendraient encore en septembre et c’est Alexis Napoléon qui en serait encore responsable. »
Issu libru ci palesa di manera tercana a vita suciale di l’èpica. Videmu l’antissemitìsimu (Marie Dominique tomba u maritu è hè liberata perchè st’ùltimu era ghjudeu), l’assurdità di a guerra, a tradizione di u scappaticciu o ancu i culori di l’uniformi francesi ind’u 1914.
Eccu dunque un libru bellu bellu, chì t’hà ottenutu u premiu di u libru corsu 2016, è chì vi farà passà una bella stonda, lighjendu e passate tremende di issu sangue di i Leca chì franca i sèculi.
Marina Chovin.