Una settimana una parolla
(O duie, o micca, sfidàtevi di e « parolle parolle parolle…»)
Ɔlʋ yɛ ama ʋkɔ ta akɔnavlɛ ala la.
Una donna chì aspetta picci dorme nant’à u spinu.
Pruverbiu ikposso.
Salute à tutte è à tutti. Sta settimana, turnemu à studià i picci.
« Aghju capitu : i gemelli sò dui, dunque li saranu cunsacrati dui artìculi ». Iè, ai a ragiò, u sughjettu hè assai vastu. In tutte e sucetà, qualsìasi u rughjone o l’èpica, a nàscita di picce o picci hè un fenòmenu anurmale, sopratuttu quandu sò gemelli veri chì s’assumiglièghjanu in tuttu. Ind’a mitulugia, t’anu una piazza particulare. Pè i Tuareg, accant’à u diu creatore Ubangiji, sò genii favurèuli o dannosi nati da a prima donna è da u primu omu di a tarra. Tutt’e dui anu avutu 15 paghji di gemelli. Un ghjornu, Ubangiji dumanda à vede i picci. Ma a mamma ne piatta a metità, avendu a paura d’ùn vèdeli mai più. U diu si mette in zerga è cundanna i gemelli piattati à esse genii gattivi.
Pè i Apapocúva è i Tembé, in Guyana, si tratta di dui picci chì u scopu hè di compie a creazione di u mondu da un Diu civilizzatore, è d’aiutà l’umanità.
Ind’è l’amerindiani di u punente, esìstenu guerrieri picci chì trasfòrmanu u mondu. Ind’è l’amerindiani di u levante, i picci sò nemichi : lòttanu trà d’elli, figurendu a lotta trà u bè è u male. Ind’è i Tupi di u Brasile, i gemelli sò u risultatu d’unioni cù l’animali (u giaguaru, a lepra, ecc.) o d’unioni incestuose. I Xingu d’Amasonìa pènsanu chì un picciu hè sulare è l’altru lunare, unu ch’ùn more micca è chì hè rispettuosu, è l’altru balòticu è murtale. Si pò pinsà quì à i studii di Zazzo chì palèsanu un cumpurtamentu sfarente trà i picci : ci hè quellu chì vole mantene u coppiu è quellu chì si vole staccà.
Indi i miti grechi anziani è latini, a nàscita di gemelli hè « anurmale » : a mamma hè cunsiderata cum’è animalesca (sò e bèstie chì t’anu parechje criature) è sprupusitata. I picci saranu dunque urgugliosi è lotteranu pè ottene u putere, ancu s’ellu ci vole à tumbà u fratellu o a surella. Pudemu ammintà quì Remus è Romulus. I picci sò dunque spessu liati à a criminalità.
Pè scunghjurà a sorte, ci vole à sbandunà u gemellu, à fà una « dégémellisation » sicondu à Zazzo.
Ind’u mondu reale, i picci sò venerati o odiati. Ind’è i Baatonu di u Benin, sò unurati chì sò un segnu venutu da u celu. Hè necessariu di vèsteli di a stessa manera, di dalli a stessa manghjusca, ecc. Ma s’è a famiglia hè pòvara, a mamma pò mette i so picci davant’à a casa da ottene limòsina. À u cuntrariu, ind’è i Tuareg, a mamma chì parturisce gemelli hè sprizzata. Malgratu tuttu, i picci maschji ricèvenu da u babbu, fatti i primi passi, una croce speziale.
Eccu per compie una canzona : https://www.youtube.com/watch?v=w f52r1K5aXY
Marina Chovin.