Sò cascati millaie di Corsi in Ponte Novu è cù a ripressione feroce dopu. Èramu l’ottu è u nove di maghju di l’annu 1769. Ùn sò tantu cambiati l’inghjustizia è u disprezzu ch’anu cunduttu à ssu fragellu. Eccu l’umagiu di u gruppu l’Arcusgi.
Arritti u dedicheghja à tè patriottu, ùn ti scurdà di a to stòria.
U sonu di u culumbu introna la custera
Ci chjama lu ribombu sott’à a cara bandera
Vicin’hè lu nemicu per piglià la Nazione
A rèdita di l’anticu ci da mille raggione
Dumane in Ponte Novu
L’arcusgi di Pasquale
Seranu à lu provu
Di l’orcu culuniale.
Cara sposa ti basgiu mi nè vo à la guerra
Dammi mondu curaggiu per salvà la mio terra
Paura ùn avemu di’ssa razza odiosa
Di fora a punteremu cun l’armata gluriosa
Diu vi salvi regina càntanu i partigiani
Sperendu la ruvina di ‘ssi rugnosi cani.
Mor’ùn aghju primura s’ell’hè pè u paese
Benchè risentu a spruva di cumbatte u francese
S’avvicina l’albore u sguard’à l’orizonte
Zirighendu u furore e milizie sò pronte
In fondu di e valle si sente cum’un frombu
Eccu e forze di u male femu scuppà lu piombu
Dumane in Ponte Novu
Contr’à a sottumissione
Seranu à lu provu
L’arcusgi di a Nazione. •