Un di i fundatori di u mìticu Canta u Populu Corsu, fiura di u Riacquistu, Natale Luciani, ci hà lasciatu un 7 di dicembre di u 2003 in un accidentu di vittura. Pueta, cumpunitore, interpretu, difensore accanitu di a lingua è a cultura corsa, Natale era un militente di prima trinca ch’ùn piattava micca u so sustegnu pè u Fronte di Liberazione Naziunale di a Corsica. Era statu arrestatu in u 1984 è cundannatu à 7 anni di prigiò. Liberatu in u 1989, suffrìa è ricusava a lotta fratricìdia chì stirpava a clandestinità. Tandu si n’hè staccatu ellu chì ludava i valori di ghjustizia, di sulidarità è di fratellanza. Appreziatu da tutti pè u so militentìsimu schietu è sinceru, s’impegnava pè a giuventù. Hè cusì ch’ellu hà creatu una scola di cantu in u 1982 per dà a voglia à sti giòvani di salvà a lingua è a cultura corsa, è fà chì e nove generazioni tramàndinu anch’elle à traversu u cantu, l’ànima corsa. Sò parechji à avè pussutu gode di a so amparera. Natale hà cuntribuitu cusì à fà chì a longa catena di u pòpulu corsu ùn si rompi micca.
A Scola di cantu di Natale Luciani dapoi più di 40 anni hè una bella rièscita di l’annate di brulighjime è di creazione culturale di u Riacquistu. Hà furmatu mondu zitelle è zitelli, giuvanotte è giuvanotti, Corsi da tutte e mamme ch’anu betu à sta surgente. Face chì Natale ferma ancu in capu di e generazioni ch’ùn l’anu micca cunnisciutu. « Simu cum’una famiglia, cum’è fratelli è surelle, cantemu tutti inseme » dìcenu sti zitelli chì li anu resu bellìssimi umagi cù parechje canzone. Frà quesse, « Di virtù », in 2021, loda sti valori cumuni di fratellanza è fraiutu ch’ellu hà trasmessu Natale. « A libertà suminava, di l’idea à sustene, di virtù. Eccu ciò ch’ellu fù » testimogna stu cantu magnìficu. Listessu cù « Lettera à Ghjuventù » esciuta in u 2023 chì sparghje u stessu spìritu. « Sò giòvani chì vòlenu cantà, chì si sèntenu corsi senza pudella sprima è cusì cù u cantu ghjùnghjenu à furmà a so persunalità. Hè impurtante » dicìa Natale spiechendu i scopi di a scola : dà un arnese di riacquistu à a giuventù.
Sò generazioni sane chì anu cresciutu à u suchju di sti valori cumuni è amparatu à tempu e note è a mùsica, sta lea forte chì l’adunisce è li danu u sensu cullettivu d’un pòpulu. Oghje animatori dopu avè esse statu elevu, certi a dìcenu, « a scola m’hà aiutatu indè a mo vita à ùn svià è à sparghje valori di fratellanza è di sulidarità ».
Da tutte l’età, maschji è fèmine s’adunìscenu tutte e settimane per cantà, à u so livellu ma dinù inseme, da permette à l’amparaticci di mischiassi cù i più avvezzi, da pudè cantà ma dinù parlà in grazia à attelli in lingua corsa.
Quist’annu, a scola hà resu un umagiu à « u sìmbulu patriottu » ch’ellu fù Yvan Colonna cù u bellìssimu cantu « Monte Barbatu ».
Cusì, in più di ripiglia i canti ch’ellu li hà lasciatu Natale Luciani è i gruppi nustrali, crèanu è s’invèntanu u s’avvene anch’elli. Hè forse u più bellu umagiu ch’elli pudìanu rende à u so fundatore. •