Spettaculu

« Sò Ella » : Oda à a donna

Sò Ella hè una creazione di u gruppu I Campagnoli. Messa in scena da Maria Anghjula Geronimi, hè un oda à a donna, ciò ch’ella hè, e so bellezze, i so sìntimi, e so lotte, e so suffrenze, è ciò ch’ella porta di forza è determinazione à l’Umanità. L’intìtulu fiara di ssu spetàculu, « sò ella », hè statu scrittu da Ghjàcumu Fusina.

A serata s’annunzia evenimentu, stu 21 di sittembre à u Teatru di Bastia.

 

In scena dapoi 33 anni, u gruppu I Campagnoli sparghje e so creazioni è e so voce à chì ne vole. Natu in San Fiurenzu in u 1989, hà sapiutu rinuvellassi cù e generazioni nove di cantarini è mischiassi cù d’altre creazioni, ripigliendu successi cum’è « Les trois cloches » in umagiu à Edith Piaf (E trè campane), « Mon vieux » di Daniel Guichard (U mo babbu), di manera più recente cù l’amicizia nata cù Pascal Obispo, cantandu cù ellu « Millesime » in u 2018, nant’à a scena di u Telethon.

U gruppu oghje hè cumpostu in giru di Guidu Calvelli, Isabella Gianella à u viulinu, Luigi Crispi (cantu), Alexis Vitello (cantu è ghitara).

 

Sò Ella hè un oda à e donne è e so suffrenze. Trè anni fà in Lìsula, quand’ella hè stata assassinata da u so cumpagnu di vita, Julie Douib, sò stati cummossi I Campagnoli cum’è mondu ghjente in Corsica. Hè nata l’edea d’un spetàculu per rende umagiu à a donna. Accumpagneranu I Campagnoli à longu à ssu spetàculu messu in scena da Maria Anghjula Geronimi, Jean Michel Gianelli (percussioni è accunciamenti), Anne Lise Herrera (viuluncellu), Olivia Savery Sanciu (pianò), Delphine Nafteux (ballu), Antoine Asaro (disegni), Armand Luciani (videò), Anna Rocchi (cantu), Carlotta Rini (cantu), Doria Ousset (cantu) è a partecipazione di u cullegiu di Biguglia « E stelle di Biguglia » rettu da Emmanuelle Marini.

Arritti ne rivenerà à parlà. •

 

I Campagnoli

E pròssime date

26/09 – Bonifaziu – 21h30 – Ghjesgia San Dumènicu
03/10 – Calvi – 18h30 – Catedrala San Ghjuvan’Battista
06/10 – Bonifaziu – 19h00 – Ghjesgia Santu Dumènicu
07/10 – San Fiurenzu – 18h30 – Catedrala di u Nebbiu
17/10 – Lìsula – 18h30 – Ghjesgia di a Misericordia

Cuntatti 07 77 30 30 65