Una settimana una parolla
(O duie, o micca, sfidàtevi di e « parolle parolle parolle…»)
He whose face gives no light, shall never become a star.
Quellu chì a faccia hè senza lume, ùn puderà mai diventà una stella.
William Blake, Proverbs of Hell.
Salute à tutte è à tutti. St’ètima circaremu à tuccà e stelle. «Quepp’allora, mi dumandu in veru cumu avete da riesce. Sò troppu in altu, ùn si ponu micca coglie cum’è i fiori ! » È e stelle cadente, ci hai pensatu ? «Ùn ti crergu micca, mi pigli à a risa. » Innò pò, a stella ùn hè micca soladimente un astru chì luce for di a luna è di u sole. Ci hè dinù a bona è a gattiva stella chì offizia à a nostra nàscita, « a stella tramuntana o pulare (quella chì indica u Nordu) », « a stella mattutina o venera », « a stella di e grazie (petra celana) », « a stella bianca (pianta di e Liliacee à fiori bianchi o gialli accaspati) », a stella di mare (« animale marinu, di l’echinodermi, à cinque (o dipiù) bracci) », a stella di u suldatu, a stella di quellu chì hè famosu ind’u mondu di u sinemà, di a mùsica, di u spettàculu, di u ballu, e stelle chì nàscenu per via di u dulore, ecc.
«Umbè, chì polisemia ! » Ah ! impieghi una parolla stilìstica ! « Iè, si tratta d’una parolla cù parechji significati.» Bravu. Demu tandu un’uchjata à l’etimulugia di a nostra stella. Ricolla à u latinu (chì surpresa !) stella chì si ritrova in tutte e lingua rumàniche (irlandese stell, brezhoneg steredenn, català estrella cù un’epentesa : u primu e ghjove à rende più fàcciule a prununzia, ecc.). In grecu anzianu, si trova, fattu cù a stessa ràdica ch’è in latinu (*stel-/*ster-), ἀστήρ (astèr).
E stelle ghjòcanu una parte impurtante ind’a realizazione di e bandere. Pensate à a bandera chinese o mericana. Ind’è noi, in Auropa, t’avemu una bandera turchina cù un chjerchju di 12 stelle. Si pudia pinsà chì stu nùmaru currispundia à u quellu di i primi paesi di l’Auropa. Ma ghjè un sbagliu : 12 simbuliza a perfezzione, l’unità. D’altronde, ci hè statu una pulèmica in quant’à u carràtaru religiose di a bandera : e stelle s’assumìglianu à a curona di Maria, u culore turchinu hè quellu di Maria, è l’adduzione di a bandera hè stata firmata l’ottu di dicembre 1955 (ùn ci hè bisognu d’insegnavvi ciò ch’ellu ripresenta stu ghjornu). Pè i capizzoni europeani, a spiegazione hè questa quì : u turchinu ghjè u celu, e stelle sò i pòpuli d’Auropa, u chjerchju ghjè l’armunia, 12 ghjè a perfezione. Ma sò numarosi quelli chì t’anu vistu astr’affare ind u sciffru 12 : e 12 ore ind’a ghjurnata è a notte, i 12 mesi di l’annata, e 12 custellazione di u zudiacu, e 12 prove d’Èrcule, a legge di e 12 tàvule in Roma, i 12 apòstuli, e 12 stelle di Maria…
Eccu per compie una canzona : https://www.youtube. com/watch?v=rKzAE3Kpy8Q
Marina Chovin.